پووختەى هەواڵەکە:

• هەڵمەتەکانى بەرێوەبەرایەتیى پۆلیسی دارستان و ژینگەی پارێزگای سلێمانی دژى ڕاوچییەکان بەردەوامە.

• هاونیشتمانییەک لە پیرەمەگرون هەڵۆیەکى گرتبوو.

• لە هەرێمى کوردستان بە یاسا چەندین کۆتوبەند بۆ ڕاوکردنى ئاژەڵ و باڵندە دانراون.

بەڕێوەبەرایەتییەکە ڕاگەیاند، بە تۆمەتی گرتنی باڵندەیەکی کێوی هاونیشتمانییەک لە شارۆچکەى پیرەمەگروون دەستگیرکرا و دەستیشبەسەر هەڵۆکەدا گیرا.

پۆلیسی دارستان و ژینگەی پارێزگای سلێمانی:

• زانیاریمان لەسەر هاونیشتمانییەک وەرگرت گوایە باڵندەیەکی کێوی لە جۆری (هەڵۆ)ـی گرتووە و لە ماڵەوە ڕاگرتووە.

• پاش وەرگرتنی فەرمانی دادوەر دەستبەجێ مەفرەزەیەك لە کارمەندانی بنکەی پۆلیسی دارستان و ژینگەی پیرەمەگروون دەرچوون بەرەو ماڵی هاونیشتمانییەکە.

• دەستیانگرت بەسەر باڵندە کێویبەکەدا، هاوکات هاونیشتمانییەکەش بە تۆمەتی ڕاوکردن و گرتنی باڵندەی کێوی دەستگیر کرا .

دەستەی پاراستن و چاککردنی ژینگە بەگوێرەى یاسای ژمارە 3ـی ساڵی 2010 و ڕێنماییە فەرمییەکانی وەک (ڕێنمایی ڕێکخستنی ڕاوکردن ژمارە یەکی ساڵی2023)، ژمارەیەک مەرج و ڕێنمایى توندی بۆ ڕاوکردنى باڵندە و ئاژەڵ داناوە.