سەرۆکى دەستەى دەسپاکى هەرێمى کوردستان رایگەیاند، لەم هەفتەیەدا پەیماننامەى شەرەف بە لیستە بەشداربووەکانى هەڵبژاردنى پەرلەمانى کوردستان واژۆ دەکەن، دەشڵێت: ئامانج لە پەیمانەکە پابەندبوونە بە پرەنسیپەکانى سەروەریی یاسا و بەڕێوەبردنى هەڵبژاردنێکى شارستانییانە.

ئەحمەد ئەنوەر، سەرۆکى دەستەى دەسپاکى هەرێمى کوردستان، بە کەناڵ8ـى راگەیاند، "داواى کۆبوونەوەى نوێنەرى لایەنە سیاسییەکان دەکەن بەئامادەبوونى یوئێن دیپى، تێبینى سەرجەم لایەنە بەشدارەکانى هەڵبژاردنیان وەرگرتووە و بەنیازن لەو کۆبوونەوەیەدا کە رۆژى سێشەممە یاخود چوارشەممە بەڕێوەدەچێت، کۆپیەکى دەخەنەبەردەم لایەنە سیاسییەکان بۆ ئەوەى واژۆى لەسەر بکەن".

سەرۆکى دەستەى دەسپاکى هەرێمى کوردستان گوتیشى، رەشنووسى پەیماننامەى شەرەف تەواوبووە و چەند خاڵێک لەخۆدەگرێت، وەک پابەندبوون بە پرەنسیپەکانى سەروەریى یاسا و بنەماکانى دیموکراسى، بەڕێوەبردنى هەڵبژاردنێکى شارستانییانە، داکۆکیکردن لە قەوارەى دەستووریی هەرێمى کوردستان، پەرەپێدانى پەیوەندییەکان لەگەڵ حکومەتى فیدراڵ لەسەر بنەماى دەستوور و یاسا بەرکارەکان، هاوکات بەرەنگاربوونەوەى گەندەڵى".

رۆژى 25ى ئەیلولى 2024، بانگەشەى هەڵبژاردنى خولى شەشەمى پەرلەمانى کوردستان دەستیپێکردووە و 15ى تشرینى یەکەم کۆتایی پێدێت و بریارە 20ـى تشرینى یەکەمى 2024 پرۆسەى دەنگدان بۆ هەڵبژاردنى پەرلەمانى کوردستان بەڕێوەبچێت.