وەزارەتی تەندروستیی حکومەتى هەرێمى کوردستان تۆمارکردنى حاڵەتێکى نوێی تای خوێنبەربوونى لە دهۆک راگەیاند.

وەزارەتەکە لە راگەیەندراوێکدا ئاماژەى بەوەشکردووە، تووشبووەکە پیاوێکی دانیشتووی شارۆچکەی سێمێلە و تەمەنی 43 ساڵە، گۆشتفرۆش بووە و بەرکەوتەی ئاژەڵی تووشبوو بووە.

راشیگەیاندووە: تووشبووەکە لە نەخۆشخانە چارەسەر وەردەگرێت و باری تەندروستی جێگیرە.

وەزارەتی تەندروستی جەخت لەسەر جێبەجێکردنی رێنماییەکانی وەزارەت بۆ رێگریکردن لە بڵاوبوونەوەى پەتاکە دەکاتەوە و داواش لە هاونیشتمانیان دەکات، لەکاتی بوونی گومان و نیشانەکانی نەخۆشی لەسەر ئاژەڵ تیمەکانی ڤێتەرنەری ئاگاداربکەنەوە.

بەگوێرەى ئامارەکانى وەزارەتى تەندروستى لە ئەمساڵدا نۆ حاڵەتى تای خوێنبەربوون لە هەرێمى کوردستان تۆمارکراون و دوو کەس گیانیان لەدەستداوە.