مەرجەکانی حکومەتی هەرێمی کوردستان بۆ هاوردەکردنی ئۆتۆمبێل لە ساڵی 2026 دا

وەزارەتى ناوخۆى حکومەتى هەرێمى کوردستان، ڕێنمایی و مەرجەکانى بۆ هاوردەکردنى ئۆتۆمبێل بۆ ساڵى 2026 ڕاگەیاند، کە تێیدا چەندین مەرجی دیاریکردووە بۆ هاوردەکردنى ئۆتۆمبێل.

مەرجەکانی هاوردەکردنی ئۆتۆمبێل

بە گوێرەى مەرجەکانى سەلامەتى بۆ هاوردەکردنى ئۆتۆمبێل، وەزارەتى ناوخۆ ڕایگەیاندووە، مەرجەکانى هاوردەکردنى ئۆتۆمبێل بۆ ساڵى 2026 دەبێت ئەم خاڵانەی تیدا بێت:

مەرجى توندوتۆڵى ئۆتۆمبێل
بڕوانامەى سى ئۆ سى
بڕوانامەى ئەى بى ئێسى
ئەگزۆزیى بێگرفت بێت، مەبەست لەم مەرجە ئەوەیە، ئەو بەردەى لەناو ساڵۆنساى ئۆتۆمبێلەکەدایە دەرنەکرابێت و تێیدا بێت تاوەکو ژینگە پیس نەکات.

ئۆتۆمبێلی سفر کیلۆمەتر

هەر ئۆتۆمبێلێک200 کیلۆمەتر رۆشتوو بەسفر دادەنرێت، واتە ئەگەر ئۆتۆمبێلێک 201 کیلۆمەتر رۆشتبێت بە ئۆتۆمبێلى سفر هەژمار ناکرێت.

تاکسیش دەبێت سفر کیلۆمەتر بێت

تاکسى دەبێت سفر کیلۆمەتر بێت، لەبارەى ئۆتۆمبێلى تایبەت دەبێت سێ مۆدێل بێت بە ساڵى دەرچوونییەوە، واتە مۆدیلى 2024 بێت.

ئۆتۆمبێلی کشتوکاڵی و بیناسازی

وەزارەتى ناوخۆ ئەوەشى باسکردووە، لەچوارچێوەى مەرجەکانى هاوردەکردنى ئۆتۆمبێل، دەربارەى ئۆتۆمبێلى کشتوکاڵى و بیناسازى 16مۆدێل بە ساڵی دەرچوونیەوە بێت، واتە مۆدیلى 2010 کەمتر نەبێت، بۆ تانکەر و کرێن 11 مۆدیل بە ساڵى دەرچوونیەوە، واتە 2015 کەمتر نەبێت.

پاس و بارهەڵگری گەورە و بچووک

بۆ پاس کە زیاتر لە 25 سەرنشین نۆ مۆدێل بەساڵى دەرچوونییەوە و بۆ بارهەڵگرى بچووک چوارمۆدێل بە ساڵى دەرچوونیەوە، بۆ بارهەڵگریى گەورە نۆ مۆدێل بە ساڵى دەرچوونیەوە، واتە 2017 بێت.

هاوردەکردنی کام ئۆتۆمبێلانە قەدەغە دەکرێن؟

وەزارەتى ناوخۆ لە مەرج و ڕێنماییەکانیدا مەرجەکانى هاوردەکردنى ئۆتۆمبێلى بۆ ساڵى 2026 باس کردووە، کە ئەم جۆرە ئۆترمبێلانە هاوردەکردنى قەدەغەیە، کە بریتین لە:

ئۆتۆمبێلى سووتاو
ئۆتۆمبێلى ژێرئاو کەوتوو
ئۆتۆمبێلى سوکانى لاى ڕاست
ئۆتۆمبێلى خوار مۆدێل

واتە بە هەموو شێوەیەک هاوردەکردنى ئو جۆرە ئوتومبێلانە بۆ هەرێمى کوردستان قەدەغە کراوە.

هایبێرد و کارەبایی لە باج دەبەخشرێن

هەروەها ئۆتۆمبێلى هایبێرد و کارەبایی لە باج دەبەخشرێن، کە پێشتر تەنیا ئۆتۆمبێلى کارەبایی لەباج بەخشرابوو، بەڵام بەگوێرەى ئەم ڕێنماییە نوێیە ئۆتۆمبێلى هایبێردیش لە باج بەخشراوە، ئەوەش هاندانێکە بۆ کۆمپانیاکانى هاوردەکردنى ئۆتۆمبێل، کە زیاتر هانیان دەدات بۆ ئەوەى ئەو جۆرە ئۆتۆمبێلانە هاوردە بکەن.

ئۆتۆمبێلی گولـلەنەبڕ (درع)

وەزارەتى ناوخۆ باسى لەوەشکردووە، کە هاوردەکردنى ئۆتۆمبێلى درع هاوردە دەکرێت بەپێى مەرجى ساڵ و مەرجە هونەرییەکان دواى تۆمارکردنى لەسەر ناوى هاوردەکراو بۆ ماوەى پێنج ساڵ کڕین و فرۆشتنى پێناکرێت.

مەرجەکان بۆ هاوردەکرمی ماتۆڕسکیل

هاوکات لەبارەى هاوردەکردنى ماتۆڕ سکیل، وەزارەتى ناوخۆ مەرجى دیاریکردووە، کە هاوردەکردنى ماتۆرسکیل تا چوار ساڵ قەدەغەیە، بەڵام هاوردەکردنى ماتۆڕسکیلى کارەبایی ڕێگەپێدراوە، رێگە پێدانەکەش بۆ فەرمانگە حکومییەکان و ئەو کۆمپانیایانەیە کە کارى دیلیڤەرى و پۆستە دەکەن.

توکتوک قەدەغەیە

هەروەها بە هەموو شێوەیەک هاوردەکردنى توکتوک قەدەغەکراوە لەلایەن وەزارەتى ناوخۆى حکومەتى هەرێمى کوردستان، کە لە پارێزگاکانى ناوەڕاست و خوارووى عێراق ڕێگەپێدراو بووە.