گرووپی کۆمپانیاکانی سەردار، کە دوێنێ کۆگاى ڕۆنەکەى هێرشیکرایە سەر و ئەمڕۆ جەخت دەکاتەوە ئەوان کۆمپانیایەکى مۆڵەتپێدراون و لەسەرانسەرى عێراق کار دەکەن.

کۆگاکانی ڕۆن و چەورکەرەکانی کاستڕۆڵ

بەڕێوەبەرایەتیی کۆمپانیاکە ڕوونیکردووەتەوە، یەکی ئەم مانگە کۆگاکانی ڕۆن و چەورکەرەکانی کاستڕۆڵی سەر بە کۆمپانیاکەیان لە شاری هەولێر تووشی ڕووداوێکی نەخوازراو بووە، بەڵام هێرشەکە کاریگەریی لەسەر بەردەوامیی خزمەتگوزارییەکانیان نابێت.

کارکردن لە کەرتی وەبەرهێنان و خزمەتگوزاریدا

ئاماژەى بەوەشکردووە، کۆمپانیاکەیان مۆڵەتپێدراوە و لە کەرتی وەبەرهێنان و خزمەتگوزاریدا کار دەکات، هەروەها پابەندییەکانیشیان سنووردارە کە خزمەتکردنی کڕیارەکانیان و بەشدارییە لە ئابووریی نیشتماندا.

بەردەوام دەبن لە بەرهەمهێنان

لە ڕوونکردەوەی کۆمپانیاکەدا باسی ئەوەشیکراوە، سەرەڕاى هێرشەکە بەرهەمەکانی ( ڕۆنی ئۆتۆمبێل، کەرەستەکانی کەرتی کشتوکاڵ و بیناسازی) لەسەرجەم پارێزگاکانی عێراق و هەرێمی کوردستان دەخەنە بازاڕەوە.

هێرشی سەر کۆگاکانی ڕۆنی کاستڕۆڵ

ئەوە لەکاتێکدایە، ڕۆژی ڕابردوو 1ـی نیسان زیاد لە چوار درۆن هێرشکرایەسەر کۆگاکانی ڕۆنی کاستڕۆڵی بەریتانی و ئاگرێکی گەورە لە کۆگاکە کەوتووە و کۆمپانیاکە ڕایگەیاند، زیانێکی زۆری داراییان بەرکەوتووە و بە ملیۆنان دۆلار دەخەمڵێنرێت.