وتەبێژی خاتەمولئەنبیا هۆشداریی توند دەداتە واشنتن و تەلئەبیب و دەڵێت، ئەوەی تا ئێستا لە شەڕدا بەکار هاتووە تەنیا بەشێکی بچووکی تواناکانی ئێرانە و لە ئەگەری بەردەوامیی شەڕ، جیهان تووشی شۆک دەکەن.

هەڕەشەی پەردەلادان لەسەر تەکنەلۆژیای نوێ

ئیبراهیم زولفەقاری، وتەبێژی خاتەمولئەنبیا لە نوێترین لێدوانیدا ڕایگەیاند، ئێران خاوەنی جۆرە چەک و تەکنەلۆژیایەکی سەربازییە کە تا ئێستا لە هیچ دەزگایەکی جیهانیدا بوونی نییە و هیچ مرۆڤێک نەیبینیووە. ناوبراو ئاماژەی بەوە کردووە کە ئەگەر شەڕ درێژە بکێشێت، تاران پەردە لەسەر تەکنەلۆژیایەک لادەبات کە جیهان تووشی شۆک دەکات.

شکستی دەزگا هەواڵگرییەکان لە ئاست نهێنییەکان

وتەبێژی خاتەمولئەنبیا ئاماژەی بەوە کردووە کە دەزگا هەواڵگرییەکانی ئەمریکا و ئیسرائیل (مۆساد) هیچ زانیارییەکیان لەسەر ئەم نهێنییە سەربازییانەی ئێران نییە. بە گوتەی زولفەقاری، ئەو دەزگایانە تەنانەت نازانن ئەو چەکانە چیین و لە چ شوێنێک جێگیر کراون، جەختیشی کردەوە کە بەکارهێنانیان شتێک ڕوودەدات کە جیهان هەرگیز پێشبینی نەکردووە.

پێشبینییەکان بۆ جۆری چەکە نادیارەکان

بەگوێرەی سەرچاوەکانی هەواڵ، کاتێک سوپایەک باس لە چەکێکی نەبینراو دەکات، ئەگەری زۆر هەیە مەبەست لێی هێرشی سایبەری پێشکەوتوو یان چەکی هایپەرسۆنیکی نوێ بێت کە سیستەمە بەرگرییەکان توانای ڕێگری لێکردنیان نەبێت. هەروەها دەکرێت مەبەست لە سیستەمی مینڕێژکردنی زیرەک بێت کە بە شێوەی دەستی و لە دوورەوە دەتەقێنرێنەوە.

کاردانەوە بەرامبەر جوڵەی کەشتییەکانی ئەمریکا

ئەم پەیامە توندەی خاتەمولئەنبیا لە کاتێکدایە کە 15 کەشتیی جەنگی ئەمریکی لە ناوچەکەدا جێگیرکراون. تاران لە ڕێگەی ئەم هۆشدارییەوە پەیام بۆ هێزە جێگیرکراوەکانی ئەمریکا دەنێرێت و ڕایدەگەیەنێت کە بەو چەکە نادیارانە توانای لەناوبردنی هەموو ئەو هێزانەیان هەیە کە لە ناوچەکەدا ئامادەییان هەیە.