ڕۆژنامەیەکی ئەمریکی لە زاری بەرپرسانی وڵاتەکەیەوە ئاشکرای دەکات، هێزی دەریایی سوپای پاسدارانی ئێران لە گەرووی هورمز هێرشی کردووەتە سەر کەشتییەکی بارهەڵگر و بەو هۆیەوە هاتووچۆی دەریایی ڕاگیراوە.

وردەکاریی هێرشەکە لە نزیک کەناراوەکانی عومان

ڕۆژنامەی (وۆڵستریت جۆرناڵ) لەسەر زاری 2 بەرپرسی باڵای سەربازیی ئەمریکا بڵاویکردەوە، هێزی دەریایی سوپای پاسدارانی ئێران هێرشی کردووەتە سەر کەشتییەکی بارهەڵگر کە ئاڵای سەنگافورەی هەڵگرتبوو. هێرشەکە لە کاتێکدا بووە کە کەشتییەکە بە گەرووی هورمزدا تێپەڕیوە و لە نزیک کەناراوەکانی عومان ڕوویداوە، بەڵام هیچ کەس بەهۆیەوە بریندار نەبووە.

ڕاگرتنی کاتیی گەشتە دەریاییەکان

ئارسینیۆ دۆمێنیگێز، سکرتێری گشتیی ڕێکخراوی نێودەوڵەتیی دەریایی ڕایگەیاند، ئاگاداری هێرشەکەن و بڕیاریان داوە بۆ ماوەیەکی کاتی پەڕینەوە و ڕزگارکردنی کەشتییەکان لە گەرووی هورمز ڕابگرن. ئەم بڕیارە تا ئەو کاتە بەردەوام دەبێت کە لە سەلامەتیی ڕێڕەوەکە دڵنیا دەبنەوە.

هۆشدارییەکانی ئێران و گرنگیی گەرووی هورمز

هاوکات لەگەڵ ئەم هێرشە، سوپای پاسدارانی ئێران هۆشداریداوە کە هاتووچۆ لە گەرووی هورمز سنووردار دەبێت و تەنیا ڕێگە بەو کەشتییانە دەدرێت تێپەڕن کە بەو ڕێڕەوانەدا دەڕۆن کە ئێران دەستنیشانی کردوون. جێگەی ئاماژەیە کە 20%ی وزەی جیهان لەم گەرووەوە دەگوازرێتەوە.

کەشی دانوستان و کاریگەریی لەسەر نرخی نەوت

ئەم ئاڵۆزییانە لە کاتێکدایە کە دانوستانەکانی ئەمریکا و ئێران بەردەوامن و گەمارۆ دەریاییەکانی ئەمریکا هەڵگیراون، ئەوەش ببووە هۆی زیادبوونی هاتووچۆی کەشتییەکان. بەهۆی زیادبوونی هاتووچۆ لە ڕێڕەوە نێودەوڵەتییەکان، نرخی نەوت بۆ نزمترین ئاست دابەزیبوو لەو کاتەوەی جەنگی ئەمریکا و ئیسرائیل دژی ئێران دەستیپێکردووە.