کۆڕبەندی ئابووریی نێوان هەرێمی کوردستان و هەرێمی مورسیای ئیسپانیا بە بەشداریی وەزیری بازرگانیی مورسیا، سەرۆکی دەستەی وەبەرهێنان و 95 کۆمپانیای هەردوولا بەڕێوە چوو. لە کۆڕبەندەکەدا چەندین گرێبەست و وەکالەتی بازرگانی لەپێناو ڕەخساندنی هەلی کار واژۆ کران و بڕیاریش درا کۆڕبەندێکی هاوشێوە لە مانگی 11ی ئەمساڵدا لە کوردستان ساز بکرێت.

ڕەخساندنی هەلی کار لە ڕێگەی کۆڕبەندەکەوە

لە ئیسپانیا، کۆڕبەندی ئابووریی هەرێمی کوردستان و هەرێمی مورسیای ئیسپانیا ئەنجامدرا و چەندین هەلی کاریش لە ڕێگەی کۆڕبەندەکەوە ڕەخسێندرا.

بەشداربوانی کۆڕبەندە ئابوورییەکە

ڕۆژی دووشەممە 29 - 6 - 2026 لە هەرێمی مورسیای ئیسپانیا بە ئامادەبوونی لویس ئەلبێرتۆ مارین گۆنزالێز، وەزیری بازرگانی و کۆمپانیاکانی هەرێمی مورسیا، دکتۆر محەمەد شوکری، سەرۆکی دەستەی وەبەرهێنان و دارەوان حاجی حامید، نوێنەری حکومەتی هەرێمی کوردستان لە ئیسپانیا و شاندێکی حکومەتی هەرێمی کوردستان و هەرێمی مورسیا و بەڕێوەبەر و نوێنەری 65 کۆمپانیای ئیسپانی و 30 کۆمپانیای هەرێمی کوردستان، کۆڕبەندی ئابووریی هەرێمی کوردستان و هەرێمی مورسیا ئەنجامدرا.

دەرفەتەکانی کاری هاوبەش لەنێوان هەردوولادا

لە سەرەتای کۆڕبەندەکەدا نوێنەری حکومەت لە ئیسپانیا بەخێرهاتنی ئامادەبووانی کرد و هیوای سەرکەوتنی لە کۆڕبەندەکە و دەرفەتەکانی کاری هاوبەشی بۆ خواستن، دواتر لویس ئەلبێرتۆ مارین گۆنزالێز، وەزیری بازرگانی و کۆمپانیاکان و کار بەخێرهاتنی سەرۆکی دەستەی وەبەرهێنانی حکومەتی هەرێمی کوردستانی کرد و دەرفەتەکانی کاری هاوبەش و پشتیوانیی وەزارەتەکەی بۆ کاری هاوبەش لەگەڵ هەرێمی کوردستان دووپاتکردەوە.

ئاسانکاری بۆ کۆمپانیا بیانییەکان لە کوردستان

دواتر دکتۆر محەمەد شوکری وێڕای خۆشحاڵی بە ئامادەبوونی لە کۆڕبەندێکی گەورەی لەم شێوەیە، دەرفەتەکانی ئاسانکاری بۆ کۆمپانیا بیانییەکان لە هەرێمی کوردستان و دەرفەتەکانی بە فرەچەشنکردنی ئابووریی هەرێمی کوردستان دووپاتکردەوە.

پێشکەشکردنی پرێزێنتەیشن و بەڕێوەچوونی پانێڵەکان

لە کۆڕبەندەکەدا دوو پرێزێنتەیشن لەسەر هەرێمی کوردستان و هەرێمی مورسیا بۆ ئامادەبووان خرایە ڕوو، دواتر لە پانێڵەکاندا دەرفەتەکانی کاری هاوبەش جەختی لێکرایەوە و هانی کۆمپانیاکان درا بۆ ئەنجامدانی کاری هاوبەش.

ئەنجامدانی دیداری ڕاستەوخۆی کۆمپانیاکان

دواتر B2B کۆمپانیاکانی هەرێمی کوردستان و هەرێمی مورسیای ئیسپانیا ئەنجامدرا، کە تێیدا لە ڕێگەی ئەو گرێبەست و وەکالەتانەوە کە ئەنجامدرا چەندین هەلی کار بۆ گەنجان دەڕەخسێندرێت.

ڕێککەوتن لەسەر سازکردنی کۆڕبەندێک لە کوردستان

کۆتایی کۆڕبەندەکە بە وتارێکی بەڕێز دکتۆر محەمەد شوکری کۆتایی هات و هەردوولا ڕێککەوتن لەسەر کۆڕبەندێکی هاوشێوە لە هەرێمی کوردستان لە مانگی 11ی ئەمساڵ بە ئامادەبوونی وەزیری بازرگانی و چەندین وەبەرهێنەری هەرێمەکە. هاوكات سەرۆکی دەستەی وەبەرهێنان سوپاسی نوێنەرایەتیی حکومەتی هەرێمی لە ئیسپانیا و پەیمانگای ئینفۆ مۆرسیا کرد بۆ ڕێکخستنی کۆڕبەندەکە.