بەڕێوەبەری گشتیی بازرگانی لە وەزارەتی بازرگانی و پیشەسازی ڕایگەیاند، تاوەکو ئێستا زیاتر لە 277 هەزار تۆن گەنم لە شارەکانی هەرێمی کوردستان وەرگیراوە و لەو بڕە زۆرترینی دەکەوێتە پارێزگای دهۆک.

ڕێژەى وەرگرتنى گەنم

نەوزاد شێخ کامیل، بەڕێوەبەری گشتیی بازرگانی لە وەزارەتی بازرگانی و پیشەسازی لە کۆنفڕانسێکی ڕۆژنامەوانی، لەبارەی کار و چالاکییەکانی بەڕێوەبەرایەتییەکەی ڕایگەیاند، تاوەکو ئێستا لە هەرێمی کوردستان لەپاش دەستپێکردنی پڕۆسەی وەرگرتنی گەنم لە جوتیاران 277 هەزار تۆن گەنم وەرگیراوە.

بەگوێرەى پارێزگاکانى هەرێمى کوردستان

لە سلێمانی و هەڵەبجە زیاتر لە 86 هەزار و 297 تۆن گەنم وەگیراوە، لە هەولێر و گوێر زیاتر لە 94 هەزار 947 تۆن گەنم وەرگیراوە، لە سنووری دهۆک زیاتر لە 96 هەزار و 450 تۆن گەنم وەرگیراوە.

چارەنووسى گەنمەکانى دەرەوەى پلانى چى بەسەردێت؟

نەوزاد شێخ کامیل دەڵێت، ئەو گەنمەی دەمێنێتەوە لە دەرەوەی پلانیش وەرناگیرێت و کۆمپانیا ناوخۆییەکان نایکڕنەوە بۆ دروستکردنی گەنم، لیژنەیەک پێکهێنراوە بۆ کۆبوونەوە لەگەڵ سەرمایەدار و بازرگانان رێکبکەون بۆ دیاریکردنی نرخێک بۆ کڕینەوەی گەنمەکە و فرۆشتنەوەی بە دەرەوەی وڵات.

بوونى سایلۆکان بۆ وەرگرتنى گەنم

لە هەرێمی کوردستان 11 سایلۆ و 2 بنکەی وەرگرتنی گەنم ئامادە کراون بۆ وەرگرتنی بەرهەمی جووتیاران. بەگوتەی بەڕێوەبەری گشتیی بازرگانی، ئەم سایلۆ و بنکانە توانای هەڵگرتنی 980,000 تۆن گەنمیان هەیە.

قەبارەى وەرگرتنى گەنم لە سایلۆکان

سایلۆکانی هەرێمی کوردستان تاوەکو کۆتاییهاتنی پشکی دیاریکراوی جووتیاران بە کراوەیی دەمێننەوە. بەگوێرەی پلانی وەرگرتن، بڕی 292,000 تۆن گەنم لە چوارچێوەی پلانی فەرمی و 108,000 تۆن گەنم لە دەرەوەی پلان لە جووتیاران وەردەگیرێت، تاوەکو تەواوبوونی ئەم بڕە پڕۆسەی وەرگرتنی گەنم لە هەموو پارێزگاکان بەردەوام دەبێت