سەرۆککۆماری ئێران ڕایدەگەیەنێت، تاران لە دانوستانەکاندا پابەندی پاراستنی بەرژەوەندییە نیشتمانییەکان بووە و هیچ ئیمتیازێکی بەپێچەوانەی بنەماکانی شۆڕش بە واشنتن نەداوە.

دانوستانەکان و ڕێککەوتنی 14 بەندی

ئەمڕۆ دووشەممە، 20ـی تەممووزی 2026، مەسعود پزیشکیان، سەرۆککۆماری ئێران ئاشکرای کرد، وڵاتەکەی لە هیچ کام لەو 14 بەندەی لە لێکگەیشتنی ئەمدواییەی نێوان تاران و واشنتندا هاتووە، پاشەکشەی نەکردووە. جەختی کردەوە کە بەدواداچوونە وردەکان نیشانی دەدەن بەشێکی زۆری دەستکەوتەکانی ئەم لێکگەیشتنە لە بەرژەوەندیی ئێراندایە و هیچ بەندێک نییە تەنیا بەرژەوەندیی یەکلایەنە بۆ لایەنی ئەمریکی فەراهەم بکات.

هێڵە سوورەکان لە دانوستاندا

سەرۆککۆماری ئێران ئاماژەی بەوە کرد، پاراستنی مافەکان، بنەماکان و بەهاکانی شۆڕش هێڵی سووری ئەوان بووە لە گفتوگۆکاندا. پزیشکیان ڕوونیکردەوە کە هیچ ئیمتیازێک بە پێچەوانەی بەرژەوەندییەکانی ئێران نەدراوە و تاران توانیویەتی لە چوارچێوەی ئەو لێکگەیشتنەدا پێگەی خۆی بپارێزێت.

دۆخی نائاسایی و بەڕێوەبردنی وڵات

پزیشکیان لە کۆبوونەوەی ئەنجوومەنی باڵای دادوەریی وڵاتەکەیدا ڕایگەیاند، ئێران لە ئێستادا لە دۆخێکی هاوشێوەی جەنگ و نائاساییدایە. ئاماژەی بەوە کرد، بەڕێوەبردنی وڵات لەم قۆناخەدا بە ڕێکار و یاساکانی ڕابردوو جێبەجێ ناکرێت و پێویستیان بە یەکڕیزی، تەبایی و هاوکاریی نێوان سەرجەم دەسەڵاتەکانی دەوڵەت هەیە بۆ تێپەڕاندنی ئەم بارودۆخە.

کێشە ناوخۆییەکان و بژێویی هاووڵاتییان

لە بەشێکی دیکەی قسەکانیدا، سەرۆککۆماری ئێران تیشکی خستە سەر کێشەکانی ناوخۆ و ڕایگەیاند، بۆ حکومەت قبووڵکراو نییە کە هاووڵاتییان بەدەست هەژاری، بێکاری و کێشەی بژێوییەوە گرفتار بن. پزیشکیان بەڵێنیدا کە بە جیددی کار بۆ چاکسازیی لە پێکهاتە نادادپەروەرەکان دەکەن و هەوڵەکانیان بۆ باشترکردنی دۆخی ئابووریی وڵات چڕ دەکەنەوە.