پۆڵا سیروان، پەرلەمانتاری فراکسیۆنی یەکێتی لە ئەنجوومەنی نوێنەرانی عێراق ئاشکرای دەکات، بۆ چارەسەرکردنی بنەڕەتیی کێشەی شایستە داراییەکانی زیاتر لە 86 هەزار مامۆستا و فەرمانبەری گرێبەست و هەمیشەیی هەرێمی کوردستان، یاداشتێکیان بە واژۆی 109 پەرلەمانتارەوە ئاڕاستەی وەزارەتی دارایی عێراق کردووە تا مووچەکانیان بخرێتە ناو بودجەی گشتیی ساڵی 2027ـەوە.

کۆکردنەوەی واژۆی پەرلەمانتاران و هەوڵە یاساییەکان

پۆڵا سیروان، پەرلەمانتاری فراکسیۆنی یەکێتی لە ئەنجوومەنی نوێنەرانی عێراق بە کەناڵ8ـی ڕاگەیاند، واژۆی 109 ئەندامی ئەنجوومەنەکە کۆکراوەتەوە و ئاڕاستەی وەزیری دارایی کراوە، تاوەکو بتوانن لە ئەنجوومەنی نوێنەراندا لۆبییەکی بۆ دروستبکەن و دواتر لە ئەنجوومەنی وەزیراندا، وەزیری دارایی عێراق ڕەزامەندی لەسەر بدات و مووچەی مامۆستا و فەرمانبەرانی گرێبەستی هەرێمی کوردستان بخرێتە ناو بودجەی ساڵی 2027ـەوە.

ڕێکارە ئیدارییەکان و سەردانی نوێنەرانی مامۆستایان

ناوبراو لەبارەی پەیوەندی و بەدواداچوونی لیژنە پەیوەندیدارەکانەوە ڕوونی کردەوە، لەپاش سەردانی نوێنەرانی مامۆستایانی گرێبەست بۆ لای فراکسیۆنە کوردییەکان و چارەسەری مووچەکانیان، کێشەکەیان بە یاداشتێک ئاڕاستەی سەرۆکایەتیی ئەنجوومەنی نوێنەران و ئاڕاستەی لیژنەی پەروەردە و ڕاوێژکاری یاسایی کراوە.

داواکاری بۆ گواستنەوەی مووچەی فەرمانبەرانی تازەدامەزراو بۆ سەر بەغداد

ناوبراو لەبارەی ژمارەی سودمەندبووان و تێچووی داراییەوە باسی لەوەش کرد، بابەتەکەیان فراوانکردووە و سەرجەم فەرمانبەرانی گرێبەست و هەمیشەیی هەرێمی کوردستان، کە پاش تەمموزی 2024 دامەزراون و ژمارەیان زیاتر لە 86 هەزار فەرمانبەرە، کراون بە یەک داواکاری و داوایان کردووە، شایستە داراییەکانیان بخرێتە ناو بودجەی ساڵی داهاتووەوە و لەبری ئەوەی مووچەکانیان لەسەر داهاتی ناوخۆی هەرێمی کوردستان بدرێت، بخرێتە سەر بەغداد.

بڕی مووچەی مانگانەی فەرمانبەرانی گرێبەست

پۆڵا سیروان لەبارەی بڕی پارەی پێویست بۆ مووچەکان ڕاشیگەیاند، ژمارەی فەرمانبەر و مامۆستاکان 86 هەزارە و بڕی مووچەی ئەوان کە پێشنیازیان کردووە بخرێتە ناو بودجەی 2027ـەوە بریتییە لە 42 ملیار دینار.