پووختەی هەواڵ

• ئاگرەکە لە سووری گوندی سەرچاو و شاخی زەردە بووە

• بەهۆی ئاگرەکەوە 35دۆنم پوش و پاوان و دارستان سووتاوە

• ئاگرەکە بە تەواوی کۆنترۆڵکراوە

• پەڕاوی لێکۆڵینەوە بۆ تۆمەتبارەکە کراوەتەوە

---

بەڕێوەبەرایەتیی پۆلیسی دارستان و ژینگەی پارێزگای سلێمانی ڕایگەیاند، کەسێکیان دەستگیر کردووە بە تۆمەتی ئەوەی هۆکار بووە لە کەوتنەوەی ئاگرەکەی سنووری قەرەداغ.

---

ئەو ناوچەیەی ئاگرەکەی تیا کەوتووەتەوە

بەڕێوەبەرایەتییەکە لە ڕاگەیێنراوێکدا دەڵێت، ئاگرەکە لە سنووری گوندی سەرچاو و شاخی زەردەی سنووری بنکەی سێوسێنانی سەر بە بەشی پۆلیسی دارستان و ژینگەی قەرەداغ کەوتبووەوە، کە بووە هۆی سووتانی نزیکەی 35 دۆنم پوش و پاوان و دارستانی سروشتی.

ئاگرەکە کۆنترۆڵکراوە

دەشڵێت: پاشئەوەی مەفرەزەیەکی بنکەی سێوسێنان گەیشتوونەتە شوێنی ڕووداوەکە، نیوەڕۆی ئەمڕۆ توانرا بەهاوکاریی کارمەندانی بەرگریی شارستانی شارەدێی سێوسێنان و هاونیشتمانییان و ژینگە دۆستانى سنوورەکە تەواوی ئاگرەکە کۆنتڕۆڵ بکرێت .

ڕێکاری یاسایی دژی تۆمەتبارەکە گیراوەتە بەر

ئاماژەى بەوەشکردووە، پاش لێکۆڵینەوەی ورد، توانرا تۆمەتبارێک دەستگیر بکرێت بەتۆمەتی هۆکاری دروستبوونی ئاگرەکە، پەڕاوی لێکۆڵینەوەی بۆ ڕێکخرا و ڕێکاری یاسایی لە دژی گیرایە بەر.