بەغداد و هەولێر لەسەر سیستمى ئەسیکۆدا ناکۆکن؛ مەرجی دەروازە نافەرمییەکان ڕێگرە
پووختەی هەواڵەکە:
- ناکۆکییەکانی هەرێم و بەغداد لەسەر چۆنیەتی وەرگرتنی باج و دەروازە نافەرمییەکان سیستمى ئەسیکۆدای دواخستووە.
- بەغداد تاوەکو ئێستا وەڵامی پێشنیازەکانی هەرێمی کوردستانی بۆ جێبەجێکردنی سیستمەکە نەداوەتەوە.
- هەرێم داوا دەکات باجی گومرگی لای خۆی بێت و بەغدادیش دەیەوێت سەرەتا داهاتەکە بۆ ناوەند بگەڕێتەوە.
- بە فەرمیکردنی 6 دەروازەی نافەرمی یەکێکی دیکەیە لە خاڵە جێناکۆکەکانی نێوان هەردوولا.
زانیارییەک گەیشتووە بە کەناڵ8 دەریدەخات کە سەرەڕای لێدوانە گەشبینانەکانی بەغداد، هێشتا هیچ وادەیەک بۆ جێبەجێکردنی سیستمی جیهانیی "ئەسیکۆدا" لە هەرێمی کوردستان دیار نییە. بەربەستە سەرەکییەکان بریتین لە ململانێ لەسەر کۆنترۆڵکردنی داهاتی گومرگی و چارەنووسی ئەو دەروازانەی کە تاوەکو ئێستا لە لایەن بەغدادەوە بە فەرمی نەناسێنراون.
خاڵە جێناکۆکەکان و پێشنیازەکان:
- دابەشکردنی داهات: هەرێم دەیەوێت خۆی باجەکە کۆبکاتەوە و نیوەی بنێرێت بۆ بەغداد، بەڵام حکومەتی فیدراڵ دەیەوێت سەرەتا داهاتەکە بچێتە خەزێنەی ناوەندی و دواتر پشکی هەرێم بگەڕێنێتەوە.
- هەژماری بانکی: پێشنیاز کراوە دوو هەژمار لە دەروازەکان دروست بکرێن بۆ دابەشکردنی داهات بە ڕێژەی 50% بۆ هەر لایەک، بەڵام هێشتا ڕێککەوتنی لەسەر نەکراوە.
- دەروازە نافەرمییەکان: هەرێمی کوردستان داوای بە فەرمیکردنی 6 دەروازەی نافەرمی دەکات، بەڵام لیژنە هاوبەشەکان تاوەکو ئێستا هیچ هەنگاوێکی کردەییان بۆ بەسەرکردنەوە و بڕیاردان لەسەریان نەناوە.
گرنگیی سیستمی ئەسیکۆدا:
سیستمی Asycuda هەوڵێکە بۆ بەئەلیکترۆنیکردنی تەواوی ڕێکارە گومرگییەکان و بەستنەوەیان بە بانکی ناوەندییەوە. جێبەجێکردنی ئەم سیستمە نەک تەنیا شەفافیەت لە داهاتەکاندا دروست دەکات، بەڵکو دەبێتە هۆی کەمکردنەوەی گەندەڵی و ڕێکخستنەوەی بازرگانی. هەرچەندە پەرلەمانتارانی کورد لە بەغداد دەڵێن بڕیارە لە چەند ڕۆژی داهاتوودا سیستمەکە جێبەجێ بکرێت، بەڵام بەرپرسانی گومرگی هەرێم جەخت دەکاتەوە کە تاوەکو کێشە تەکنیکی و سیاسییەکان چارەسەر نەکرێن، هیچ هەنگاوێکی فەرمی نانرێت.
زانیاری زیاتر بۆ تۆ
سیستمی ئەسیکۆدا و ئاڵنگارییەکان
گوتەبێژی حکومەتی عێراق: ئەسیکۆدا پابەندییەکی نێودەوڵەتییە؛ "بۆ بەرەنگاربوونەوەی سپیکردنەوەی پارەشە"
سروە محەممەد: سیستمى ئەسیکۆدا دەبێتە هۆى شەفافییەتى تەواو بۆ داهاتى نانەوتى
2 کاتژمێر پێش ئێستا