داهاتی گومرگی عێراق ئاستێکی پێوانەیی نوێ تۆمار دەکات

پووختەی هەواڵەکە:

داهاتی گومرگی عێراق لە حەوت مانگی یەکەمی ئەمساڵدا گەیشتووەتە 2.5 ترلیۆن دینار.

کۆی داهاتی ئەم حەوت مانگە یەکسانە بە تەواوی داهاتی گومرگی ساڵی ڕابردوو.

پێشبینی دەکرێت تاوەکو کۆتایی ساڵ قەبارەی داهاتەکە بگاتە 3.5 ترلیۆن دینار.

جێبەجێکردنی سیستمی ئەلیکترۆنی و "ئەسیکۆدا" هۆکاری سەرەکی زیادبوونی داهات و کەمبوونەوەی گەندەڵین.

زانیارییەک گەیشتووەتە کەناڵ8 کە ئاماژە بە بەرزبوونەوەی داهاتی گومرگی عێراق دەکات بۆ ئاستێک کە لە مێژووی دامەزراندنی دەوڵەتی عێراقەوە وێنەی نەبووە. تەنیا لە مانگی تەمموزدا 560 ملیار دینار کۆکراوەتەوە، ئەمەش بەهۆی بەستنەوەی سەرجەم دەروازەکانە بە سیستمی ئەلیکترۆنییەوە بۆ ڕێگری لە خۆدزینەوە لە باج و گومرگ.

سامر قاسم تائی، بەڕێوەبەری گشتیی دەستەی گومرگی عێراق ڕایگەیاند:

داهاتی گومرگ گەیشتووەتە بەرزترین ئاست و تەنیا لە مانگی تەمموزدا 150 ملیار دینار زیاتر لە هەمان مانگی پار زیادی کردووە.

جێبەجێکردنی سیستمی "ئەسیکۆدا" و بەستنەوەی ئەلیکترۆنی دەروازە فیدراڵییەکان ڕۆڵی سەرەکییان لە سنووردارکردنی گەندەڵیدا هەبووە.

داهاتی حەوت مانگی ئەمساڵ گەیشتووەتە 2.5 ترلیۆن دینار و چاوەڕوان دەکرێت تا کۆتایی ساڵ بگاتە 3.5 ترلیۆن دینار.

سیستمە نوێیەکە پرۆسەی کۆکردنەوەی باج و گومرگی لە تەواوی دەروازە سنوورییەکان ڕێکخستووەتەوە.

ئامار و پاشخانی دەروازە سنوورییەکان:

داهاتی گومرگی عێراق لە سێ ساڵی ڕابردوودا گەشەی بەردەوامی بەخۆوە بینیوە؛ لە ساڵی 2023 بڕی یەک ترلیۆن دینار بووە، لە ساڵی 2024 بووەتە دوو ترلیۆن و لە ساڵی 2025دا گەیشتووەتە 2.5 ترلیۆن دینار. عێراق خاوەنی 19 دەروازەی وشکانیی نێودەوڵەتییە کە پێنجیان لە هەرێمی کوردستانن، لەگەڵ شەش دەروازەی ئاوی و پێنج فڕۆکەخانەی نێودەوڵەتی کە دوو فڕۆکەخانەیان لە هەرێمی کوردستانن.

زانیاری زیاتر بۆ تۆ

گومرگی عێراق: لە پێنج مانگدا داهاتمان گەیشتووەتە نزیکەی یەک تریلیۆن و نیو

دەستەی گشتیی گومرگی عێراق: هەواڵی زیادکردنی 500%ـی باج لەسەر شیری منداڵان ڕاست نییە

گومرگی عێراق: داهاتی مانگی کانوونی دووەم 137 ملیار دیناری تێپەڕاندووە