مالیکی و ئەمریکا پرسی سنووردارکردنی چەک تاوتوێ دەکەن
پووختەی هەواڵەکە:
- نوری مالیکی و کاربەڕێکەری باڵیۆزخانەی ئەمریکا لەسەر پرسی چەک و پەیوەندییە دووقۆڵییەکان کۆبوونەوە.
- لیژنەیەکی تایبەت لە ناو چوارچێوەی هەماهەنگی بۆ کۆکردنەوەی چەک لەدەستی دەوڵەت پێکهێنراوە.
- بڕیارە لیژنەکە بە هەماهەنگی لەگەڵ حکومەتی عێراق بەمزووانە میکانیزمەکانی جێبەجێکردنی پڕۆسەکە دیاری بکات.
- هەردوولا جەختیان لە گرنگیی پاراستنی سەروەریی عێراق و بەهێزکردنی دامەزراوە دەستوورییەکان کردەوە.
زانیاری گەیشتووە بە کەناڵ8 ئاشکرای دەکەن کە نوری مالیکی لە کۆبوونەوەی لەگەڵ جۆشوا هاریس نەخشەڕێگایەکی نوێی بۆ کۆتاییهێنان بە دیاردەی چەکداریی دەرەوەی یاسا خستووەتە ڕوو، کە تێیدا بڕیاردراوە لیژنەیەکی باڵا پێکبهێنرێت بۆ ئەوەی دامەزراوە دەستوورییەکان ببنە تاکە مەرجەعی بەڕێوەبردنی دۆسیە ئەمنی و سەربازییەکان.
نوری مالیکی (سەرۆکی هاوپەیمانیی دەوڵەتی یاسا) ڕایگەیاند:
- لیژنەیەکی تایبەت بۆ کۆکردنەوەی چەک لەدەستی دەوڵەت پێکهێنراوە و بەمزووانە دەستبەکار دەبێت.
- پڕۆسەکە بە هەماهەنگی تەواو لەگەڵ حکومەت دەبێت بۆ دۆزینەوەی میکانیزمی گونجاو.
- دەوڵەت و دامەزراوەکانی مەرجەعی سەرەکین بۆ بڕیاردان لەسەر دۆسیە ئەمنییەکان.
- داوای پەرەپێدانی پەیوەندییەکانی لەگەڵ واشنتن کرد بە جۆرێک کە بەرژەوەندییە هاوبەشەکان و سەروەریی عێراق بپارێزێت.
کاربەڕێکەری باڵیۆزخانەی ئەمریکا (جۆشوا هاریس):
جۆشوا هاریس ستایشی ڕۆڵی سیاسیی نوری مالیکی کرد لە پشتگیریکردنی سەقامگیری و بەهێزکردنی لێکتێگەیشتنە سیاسییەکان لە عێراقدا. هەروەها پێزانینی خۆی بۆ هەڵوێستەکانی مالیکی دەربڕی لە پشتگیریکردنی هەوڵەکانی حکومەت بۆ بەهێزکردنی دامەزراوەکانی دەوڵەت و چارەسەرکردنی دۆسیە نیشتمانییەکان لە چوارچێوەی ڕێککەوتنی ستراتیژیی نێوان هەردوو وڵات.
زانیاریی زیاتر لەسەر کۆبوونەوەی لایەنە شیعەکان:
ئەم جموجۆڵە دیپلۆماسییەی مالیکی دوای کۆبوونەوەی شەوی ڕابردووی چوارچێوەی هەماهەنگی دێت لە ماڵی عەممار حەکیم، کە تێیدا سنووردارکردنی چەک وەک داواکارییەکی نیشتمانی تاوتوێ کرا. ئەم هەنگاوانە هاوکاتن لەگەڵ نزیکبوونەوەی وادەی کۆتاییهاتنی ئەرکی هاوپەیمانی نێودەوڵەتی لە عێراق و هەوڵدان بۆ یەکخستنی بڕیارە ئەمنییەکان لە ژێر چەتری حکومەتدا.
زانیاری زیاتر بۆ تۆ
عێراق لەبەردەم ئاڵنگاریی چەکدانانی پێنج گرووپی مقاوەمەی ئیسلامی
سەعد مەعن: بڕیارى کۆکردنەوەى چەک لە دەستى دەوڵەت حەشدى شەعبى ناگرێتەوە
حکومەتی عێراق: تاوەکو 30ی ئەیلوول دەبێت چەک لەدەستی دەوڵەتدا بێت
2 کاتژمێر پێش ئێستا