ئێران مەرجەکانی بۆ کردنەوەی کاتیی گەرووی هورمز ئاشکرا دەکات

پووختەی هەواڵەکە:

لێکتێگەیشتن لەگەڵ عومان بە واتای کردنەوەی دەستبەجێی گەرووی هورمز نایەت.

ئێران جێبەجێکردنی مەرجەکانی کردووەتە پێش مەرج بۆ کردنەوەی ڕێڕەوە ئاوییەکە.

ڕێڕەوە پێشنیارکراوەکە 7 میل دەبێت؛ چوونەژوورەوە لە ئێران و دەرچوون لە عومانە.

وادەی 30 بۆ 60 ڕۆژ بۆ دانوستان لەسەر ڕێگایەکی هەمیشەیی دیاریکراوە.

ئێران گەرووی هورمزی وەک دۆسیەیەکی ئاسایشی نەتەوەیی مامەڵە لەگەڵ دەکات و مەرجی قورسی بۆ کردنەوەی داناوە. تاران ڕایگەیاندووە تەنیا لە حاڵەتی گۆڕینی بنەڕەتی لە ڕێڕەوەکانی چوونەژوورەوە و دەرچوون و جێبەجێکردنی داواکارییەکانی، ئامادەیە ڕێگە بە هاتوچۆی کەشتییەکان بدات.

مەرجەکانی ئێران:

کازم غەریب ئابادی، جێگری وەزیری دەرەوەی ئێران، دەڵێت مەرج نییە سبەی گەرووەکە بکرێتەوە.

ئێران پێداگری دەکات کە دەبێت ڕێگای چوونەژوورەوە بۆ کەنداو تەنیا لە ناو ئاوەکانی خاکی وڵاتەکەی بێت.

پانایی ڕێڕەوە پێشنیارکراوەکە 7 میل دەبێت و ڕێگای دەرچوونیش دەکەوێتە ناو ئاوەکانی عومان.

تاران وادەی 30 بۆ 60 ڕۆژی دیاریکردووە بۆ گەیشتن بە ڕێککەوتنی هەمیشەیی لەسەر ڕێڕەوە نوێیەکە.

هەڵوێستی عومان:

وەزیری دەرەوەی عومان گفتوگۆکانی لەگەڵ لایەنی ئێرانی بە "بونیادنەر" وەسف کردووە و هیوای خواستووە لە ئایندەیەکی نزیکدا بگەنە ڕێککەوتن بۆ کردنەوەی ڕێڕەوێکی کاتی لە گەرووی هورمز. عومان هەوڵ دەدات وەک نێوەندگیرێک گرژییەکانی ناوچەکە کەم بکاتەوە، بەڵام جێگری وەزیری دەرەوەی ئێران هۆشداری دەدات کە تاوەکو مەرجەکانیان جێبەجێ نەکرێت، گەرووەکە بە داخراوی دەمێنێتەوە.