شاندى دارایی هەرێمى کوردستان بۆ تاوتوێى پڕۆژەى بودجە دەچنە بەغداد

پووختەی هەواڵەکە

شاندێکی دارایی هەرێمی کوردستان بۆ تاوتوێکردنی پڕۆژەیاسای بودجەی 2027ی عێراق سەردانی بەغداد دەکات.

شاندەکە لە کۆبوونەوەی ڕۆژی 3ی ئەیلولدا لەگەڵ لیژنەی باڵای ئامادەکردنی پڕۆژەکەدا بەشدار دەبێت.

هەرێمی کوردستان بە تێکڕا داوای نزیکەی 29 ترلیۆن دیناری وەک شایستەی دارایی کردووە.

بەگوێرەی زانیارییەک، کە بە کەناڵ8 گەیشتووە، وەزارەتی دارایی عێراق بە نووسراوی فەرمی شاندی دارایی هەرێمی کوردستانی ئاگادارکردووەتەوە تاوەکو ڕۆژی پێنجشەممە 3ی ئەیلول بەشداری لە کۆبوونەوەی ئامادەکردنی هێڵە گشتییەکانی پڕۆژەبودجەی 2027 بکەن و بەرپرسێکی دارایی هەرێمیش ئامادەیی شاندەکەی بۆ چوونیان بۆ بەغداد جەختکردووەتەوە.

ئەندامان و کارنامەی شاندی هەرێمی کوردستان

شاندەکە لە دکتۆر ماکوان جەمیل، بەڕێوەبەری گشتیی بودجە و دکتۆر کۆڤان تەحسین، بەڕێوەبەری گشتیی ژمێرکاری و بەرپرسێکی دیکەی وەزارەتی دارایی پێکهاتوون.

شاندەکە کار لەسەر جێگیرکردنی پشکی %14.1ی هەرێم دەکات بەگوێرەی سەرژمێریی دانیشتووان.

تاوتوێکردنی بودجەی وەبەرهێنان لە پشکی هەرێم بە گوژمەی 5 ترلیۆن و 500 ملیار دینار بۆ ئەنجامدانی پڕۆژەی ستراتیجی.

داواکردنی شایستە داراییەکانی خانەنشینانی ساڵانی 2025 و 2026 لەوانەش پاداشتی 12 مووچەی خزمەت.

هەوڵدان بۆ چارەسەرکردنی گرفتە داراییەکانی بەشەبودجەی هەرێم لەڕێگەی لۆبی و پاڵپشتیی وەزیرەکان و نوێنەرانی کورد.

پلان و خشتەی کاتیی وەزارەتی دارایی عێراق

وەزارەتی دارایی عێراق کە هەموو پێنجشەممەیەک لەگەڵ نوێنەری وەزارەت و پارێزگاکان کۆدەبێتەوە، بڕیاریداوە تاوەکو 15ی ئاب هێڵە گشتییەکان و پێش کۆتایی مانگیش بەندەکانی پڕۆژەبودجەی 2027 تەواو بکات تاوەکو ڕەوانەی ئەنجوومەنی وەزیرانی بکات، هەروەها ئەنجوومەنی وەزیرانیش دوای دوو هەفتە لە گفتوگۆ و پەسەندکردنی، پڕۆژەکە ڕەوانەی ئەنجوومەنی نوێنەران دەکات.

زانیاریی زیاتر لەسەر بابەتەکە

ڕۆژی 21ی ئاب، وەزارەتی دارایی و ئابووریی هەرێمی کوردستان بە شێوازی ئەلیکترۆنی و کاغەز داواکاریی پشکی بودجەی هەرێمی بۆ ساڵی 2027 کە نزیکەی 29 ترلیۆن دینارە ناردووەتە بەغداد، ئەمەش لە کاتێکدا کە لە کۆبوونەوەکانی پێشووی لیژنەی ئامادەکردنی بودجەدا نوێنەرانی هەرێم بەشدارییان نەکردبوو.

زانیاریی زیاتر بۆ تۆ

بەمۆدێلێکی نوێی ئابووری لەکۆمپانیاکانی پاڵاوتن 15 ملیار دۆلار بودجە بۆ عێراق دابیندەکرێت

بۆ یەکەمجار لە عێراق بودجەی بەرنامە و کارامەیی جێبەجێ دەکرێت

وردەکارییەکانی پشکی بودجەی هەرێمی کوردستان لە بودجەی عێراق دا