پووختەی هەواڵەکە

• لە سەرەتای ئەم هەفتەیەدا ڕێکارەکانی ناردنی تەمویلی مووچەی مانگی هەشت پاش لێبڕینی 120 ملیار دینار کۆتاییان دێت.

• وەزارەتی دارایی خشتەی مووچەی ئامادە کردووە و دابەشکردنی پارە بەشێوەی کاش بە یەکجاری کۆتایی پێهێنراوە.

• زیاتر لە یەک ملیۆن مووچەخۆر لە ڕێگەی کارتی بانکیی پرۆژەی هەژماری منەوە مووچەی مانگی ئاب وەردەگرن.

---

بەگوێرەی زانیارییەک، کە لە شاندی دارایی هەرێمی کوردستانەوە بە کەناڵ8 گەیشتووە، سەرەتای ئەم هەفتەیە تەمویلی مووچەی مانگی هەشت پاش لێبڕینی 120 ملیار دینار ڕەوانەی هەرێمی کوردستان دەکرێت و ڕێکارە بانکییەکانی ناردنی پارەکە لە تەواوبووندایە.

---

ڕێکارەکانی ناردن و دابەشکردنی مووچە

• ئەگەر کارەکان لە بەغداد تەواو بکرێن، لقی هەولێری بانکی ناوەندیی عێراق بە ناردنی ئیمەیڵێک لە گەیشتنی پارەی مووچە ئاگادار دەکرێتەوە.

• وەزارەتی دارایی و ئابووریی هەرێمی کوردستان لەلایەن بانکی ناوەندییەوە ئاگادار دەکرێتەوە و تەمویلەکە دەخرێتە سەر هەژماری دارایی هەرێمی کوردستان.

• خشتەی مووچەی مانگی هەشت ئامادە کراوە و بەراورد بە مانگی تەمووز گۆڕانکارییەکی ئەوتۆی تێدا نەکراوە.

• ڕادەستکردنی لیستی مووچە و تەرازووی پێداچوونەوە لە 23ـی ئابدا بۆ ڕێگریکردن بووە لە دواکەوتنی مووچە و یەکلاکردنەوەی وردبینییەکان.

کۆتاییهاتنی دابەشکردنی مووچە بە کاش

وەزارەتی دارایی و ئابووریی هەرێمی کوردستان ڕایگەیاندووە لەم مانگەوە مووچە بە کاش نادرێت و لەڕێگەی کارتی هەژماری منەوە دابەش دەکرێت. هاوکات لە نوسینگەی سەرەکیی هەژماری من بە کەناڵ8 ڕاگەیەندراوە کە زیاتر لە یەک ملیۆن کارتی بانکی دابەشکراوە و داوا لەو مووچەخۆرانەش دەکەن کە هێشتا کارتەکانیان وەرنەگرتووەتەوە، سەردانی ئەو بانکانە بکەن کە پێشتر مووچەی کاشیان لێ وەرگرتووە تا کارتەکانیان وەربگرنەوە.

زانیاریی زیاتر لەسەر بابەتەکە

پێشتر وەزارەتی دارایی و ئابووریی هەرێمی کوردستان لە ڕۆژی سێشەممە 18ـی ئاب دابەشکردنی مووچەی مانگی تەمووزی مووچەخۆرانی دەستپێکرد و لە ڕۆژی پێنجشەممە 20ـی ئابی 2026 کۆتایی بە پرۆسەی دابەشکردنی مووچەی ئەو مانگە هێنا.

زانیاریی زیاتر بۆ تۆ

شاندی دانوستانکاری هەرێم ئەنجامی کۆبوونەوەکانی بەغداد دەگەیەنێتە لایەنە سیاسییەکان

شاندى هەرێمى کوردستان ئەنجامى سەردانەکەیان بۆ بەغداد خستەڕوو