پووختەی هەواڵەکە

• سەرۆک و بەڕێوەبەرانی گەورە کۆمپانیاکانی تەکنەلۆجیا هاوڕان لەسەر ئەوەی پێویستە پەرەپێدانی مۆدێلەکانی ژیریی دەستکرد خاو بکرێتەوە و چاودێریی سەربەخۆیان لەسەر دابنرێت.

• توێژەرێکی دەستلەکارکێشاوەی بواری ژیریی دەستکرد هۆشداریدەدات لەوەی ئەگەری لەناوچوونی مرۆڤایەتی لە 10 ساڵی داهاتوودا زیاتر لە 10%ـە.

• شارەزایان لە پەرلەمانی بەریتانیا مەترسییەکانی تەکنەلۆجیاکە بە چەکی ئەتۆمی بەراورد دەکەن، بەڵام دۆناڵد ترەمپ سنووردارکردنەکانی سەر ژیریی دەستکرد کەمدەکاتەوە.

---

داریۆ ئامۆدی، سەرۆکی کۆمپانیای ئەنترۆپیک و بەڕێوەبەری ئۆپن ئەی ئای و ئیلۆن مەسک، هۆشداری دەدەن لە مەترسییەکانی ژیریی دەستکرد و داوا دەکەن پەرەپێدانی ئەو مۆدێلانە خاو بکرێتەوە و چاودێری بکرێت.

---

هەڵوێستی کۆمپانیاکان و هۆشدارییەکانی ناوەندە تەکنەلۆجییەکان

• داریۆ ئامۆدی سەرۆکی ئەنترۆپیک پێشنیازی کردووە مۆدێلەکان لەکاتی پەرەپێدانیاندا چاودێریی سەربەخۆیان لەسەر بێت و کۆمپانیا ڕکابەرەکانیشی پشتیوانییان لە بیرۆکەکەی کردووە.

• سام ئەڵتمان بەڕێوەبەری جێبەجێکاری ئۆپن ئەی ئای هاوڕایە لەگەڵ پێشنیازەکان و نیگەرانی دەربڕیوە لەوەی تەکنەلۆجیاکە لە کۆنترۆڵی مرۆڤ دەربچێت.

• ئیلۆن مەسک دامەزرێنەری کۆمپانیای ئێکس ئەی ئای جەختی لە دروستیی لێدوانەکانی سەرۆکی کۆمپانیای ئەنترۆپیک لەبارەی مەترسییەکان کردووەتەوە.

• کارمەندێکی باڵای ئەنترۆپیک هۆشداری داوە کە زیاتر لە 10% ئەگەر هەیە تەکنەلۆجیاکە لە دەیەی داهاتوودا مرۆڤ لەناوببات و هیچ پلانێکیش بۆ پاراستنیان نییە.

• جەیکۆب کۆکسۆن توێژەری بواری ژیریی دەستکرد دەستی لەکارکێشایەوە و ڕایگەیاند کە کۆمپانیاکان بە بەرپرسیارێتی کار ناکەن و قومار بە ژیانی مرۆڤەوە دەکەن.

• کۆکسۆن لە لێدوانێکیدا بۆ بی بی سی ئاشکرایکردووە، ئەگەر پەرەپێدان بەم خێراییەی ئێستا بڕوات، ئەگەرێکی بەهێز هەیە مرۆڤایەتی لە داهاتوویەکی نزیکدا لەناوبچێت.

بەراوردکردنی ژیریی دەستکرد بە چەکی ئەتۆمی لە بەریتانیا

لە پەرلەمانی بەریتانیا شارەزایانی بواری تەکنەلۆجیا و چالاکوانانی نەهێشتنی چەکی ئەتۆمی مەترسییەکانی ژیریی دەستکردیان خستەڕوو و هۆشدارییان دا کە دەکرێت مەترسییەکەی لە چەکی ئەتۆمیش زیاتر بێت؛ هاوکات بیاتریس فین براوەی خەڵاتی نۆبڵی ئاشتیی 2017 بۆ نەهێشتنی چەکی ئەتۆمی بە پەرلەمانتارانی گوت، ئەمە یەکەمجار نییە مرۆڤایەتی ڕووبەڕووی توانایەک دەبێتەوە کە دەکرێت لە کۆتاییدا ببێتە هۆی لەناوچوونی هەمووان.

هەڵوێستی دۆناڵد ترەمپ بەرامبەر سنووردارکردنی ژیریی دەستکرد

لە کاتێکدا پسپۆڕانی بوارەکە داوای هەنگاوی جدی و بەپەلە دەکەن بۆ پێشگرتن لە کارەساتی مرۆیی، دۆناڵد ترەمپ سەرۆکی ئەمریکا لە ئیدارە نوێکەیدا بە پێچەوانەوە سنووردارکردنەکانی سەر پەرەپێدانی ئەم تەکنەلۆجیایەی کەمکردووەتەوە و ڕایگەیاندووە، ئەگەر لە بواری ژیریی دەستکرددا سەرکەوتوو نەبن، وڵاتەکەی دەکەوێتە دۆخێکی زۆر خراپەوە.

زانیاریی زیاتر لەسەر بابەتەکە

ئەم نیگەرانییە گەورانەی پسپۆڕان لەبارەی مەترسیی لەناوچوونی مرۆڤایەتی لە کاتێکدایە کە لە ئێستادا زۆرینەی خەڵک لە جیهاندا وەک چاتبۆتێکی قسەخۆش لە ژیریی دەستکرد دەڕوانن و تەنیا بۆ گفتوگۆکردن و دروستکردنی وێنە بەکاری دەهێنن، بەڵام لە ناوەندە زانستییەکاندا ترسێکی بەهێز دروستبووە لەوەی خێرایی پێشکەوتنی تەکنەلۆجیاکە لە ماوەی 10 ساڵی داهاتوودا سەرجەم مرۆڤایەتی بباتە لێواری لەناوچوون.

زانیاریی زیاتر بۆ تۆ

نەتەوەیەکگرتووەکان: ژیریی دەستکرد هەڕەشەیەکی نەناسراوە بۆ سەر مرۆڤایەتی

16 ڤایرۆس لەڕێگەی ژیریی دەستکردەوە دروستکران

کۆنفرانسی جیهانیی ژیریی دەستکرد لە شەنگهای؛ چین بە مرۆڤی ڕۆبۆتئاسا داهاتووی پیشەسازی دەگۆڕێت

سەرۆکی چین: نابێت پەرەپێدانی ژیریی دەستکرد یەک وڵات قۆرخی بکات