• تیبۆ کۆرتوا سەرەڕای تووشبوونی بە ئەنفلۆنزا، لەگەڵ ڕیال مەدرید گەشتی شاری بەرشلۆنەی کرد.

• گۆڵپارێزە بەلجیکییەکە بە نەخۆشییەوە خۆی گەیاندە یاریی کلاسیکۆ کە بڕیارە ئەمشەو کاتژمێر (23:00) ئەنجام بدرێت.

• یانەی شاهانە ئێلیا فۆلۆشینی گۆڵپارێزی لاوی بۆ قەرەبووکردنەوەی پێگەی کۆرتوا بانگهێشت کرد.

• یارییەکە ڕۆڵێکی یەکلاکەرەوەی هەیە لە ململانێی نازناوی ئەم وەرزەی خولی ئیسپانی.

ماریۆ کۆرتێگانای ڕۆژنامەوانی ئیسپانی ئاشکرای کرد، کە تیبۆ کورتوای گۆڵپارێزی ڕیال مەدرید، سەرەڕای تووشبوونی بە ئەنفلۆنزا، بڕیاری داوە گەشت بکات بۆ بەرشلۆنە؛ بەو هیوایەی بتوانێت لە یاریی کلاسیکۆی ئەمشەو یەکشەممە لە چوارچێوەی گەڕی 10ی خولی ئیسپانی بەشدار بێت.

لە دوایین کاتژمێرەکاندا گۆڵپارێزە بەلجیکییەکە تووشی کێشەی تەندروستی بووە، ئەوەش گومانی لە ئامادەبوونی لەم ڕووبەڕووبوونەوە چارەنووسسازەدا دروست کرد و یانەی ڕیاڵ مەدریدی ناچار کرد پێکهاتەکەی دەستکاری بکات. لەبەر ئەوە یانەی شاهانە ئێلیا فۆلۆشینی گۆڵپارێزی لاوی بانگهێشت کرد، تاوەکو لە ئەگەری ئامادەنەبوونی کۆرتوادا وەک گۆڵپارێزی یەدەگی ئەندرێ لونین بۆ یارییەکە ئامادە ببێت.

ڕیاڵ مەدرید بە وردی چاودێریی ڕەوشی تەندروستیی گۆڵپارێزە سەرەکییەکەی دەکات، بەهۆی گرنگیی ئەم یارییە لە ململانێی بەدەستهێنانی نازناوی لا لیگا، لە کاتێکدا کۆرتوا هیوا دەخوازێت بە خێرایی چاک ببێتەوە و دەرفەتی بەشداریکردنی لە کلاسیکۆدا پێ ببرێت.