سەرۆکی یەکێتیی نیشتمانیی کوردستان لە مۆسکۆ لەگەڵ سێرگی لاڤرۆڤ، وەزیری دەرەوەی رووسیا کۆبووەوە و گۆڕانکارییە سیاسی و ئەمنییەکانی ناوچەکەیان تاوتوێکرد.
ئەمڕۆ پێنجشەممە، 28ی ئازاری 2024، بافڵ جەلال تاڵەبانی، سەرۆکی یەکێتیی نیشتمانیی کوردستان لە مۆسکۆ لەگەڵ سێرگی لاڤرۆڤ، وەزیری دەرەوەی رووسیا کۆبووەوە و بەگوێرەی راگەیەندراوێک کە نووسینگەی رۆژنامەوانیی سەرۆکی یەکێتی بڵاویکردووەتەوە، " دوایین گۆڕانکارییە سیاسی، ئابووری و ئەمنییەکانی ناوچەکە تاوتوێکراون و جەخت لە پەرەپێدانی پەیوەندییەکانی نێوان هەرێمی کوردستان، عێراق و رووسیا کراوەتەوە".
لە کۆبوونەوەکەدا سەرۆکی یەکێتی هاوخەمیی حیزبەکەی سەبارەت بە "هێرشە تیرۆریستییەکەی" هەفتەی رابردووی مۆسکۆ ئاڕاستەی گەل و وڵاتی مۆسکۆ کردووە و جەختی لە پتەوکردنی هەوڵە جیهانییەکان کردەووەتەوە بۆ"رووبەڕووبوونەوەی بیری توندڕەوی، هەماهەنگیی نێوان وڵاتان بۆ زاڵبوون بەسەر ئاڵنگارییە ئەمنییەکان و لەناوبردنی پاشماوەکانی تیرۆر کە تاوەکو ئێستاش هەڕەشە لە مرۆڤایەتی دەکات".
لەدرێژەی کۆبوونەوەکەدا بافڵ جەلال تاڵەبانی جەختی لە گەشەپێدانی پەیوەندییە سیاسییەکان کردووەتەوە و ستراتیژیی یەکێتی لەبارەی رووداوە سیاسییەکان خستووەتەڕوو و راگەیاندووە، "پێویستە سەروەریی خاکی عێراق و هەرێمی کوردستان پارێزراوبێت و وڵاتەکەمان نەبێتە جێگەیەک بۆ یەکلاییکردنەوەی ناکۆکییەکان".
لەبەرامبەردا سێرگی لاڤرۆڤ، وەزیری دەرەوەی رووسیا پابەندبوونی وڵاتەکەی بە ئاشتیی درێژخایەن لە ناوچەکە دووپاتکردووەتەوە بۆ سیاسەتی دەستوەرنەدان لە کاروبار و سەروەرییەکانی عیراق، جگەلەوەی هەردوولا پێویستیی پاراستنی سەقامگیریی سیاسی و ئاشتییان لە عیراق و ناوچەکە دووپاتکرووەتەوە.
بەگوێرەی راگەیەندراوەکە، پەیوەندییە مێژووییەکانی نێوان گەلی کورد و رووسیا تەوەرێکیتری کۆبوونەوەکە بووە "هەردوولا بەپەرۆشییەوە جەختییان لە پەرەپێدان و فراوانترکردنی کردەوە، هەروەها هەوڵەکانی سەرۆک مام جەلال لە دانانی نەخشەڕێگای پەیوەندییەکە، بەرزنرخێنرا".
هاوکات وەزارەتی دەرەوەی رووسیا راگەیەندراوێکی لەبارەی کۆبوونەوەکە بڵاوکردووەتەوە و ئاماژەی بەوەکردووە، "فراوانکردنی پەیوەندی و هاریکارییەکان لەچوارچێوەی پاراستنی بەرژەوەندیی هاوبەش گفتوگۆی لەبارەوەکرا".
