عێراق گرێبەستێکى بۆ کڕینى 41 فڕۆکەى جەنگیی لەگەڵ ئەمریکا واژۆ کرد، گوتەبێژى حکومەتى عێراقیش دەڵێت، لە چەند مانگى داهاتوودا فڕۆکەکان دەگەنە عێراق.
باسم عەوادى، گوتەبێژى حکومەتى عێراق، بە تۆڕى ( سى، ئێن، بى، سى)ى ئەمریکى، راگەیاند، دواى دیدارەکەى محەمەد شیاع سودانى و جۆ بایدن، عێراق گرێبەستێکى لەگەڵ ئەمریکا واژۆکردووە بۆ کڕینى 41 فڕۆکەى جەنگی.
گوتیشى، لە چەند مانگى کەمى داهاتوودا، فڕۆکەکان رادەستى عێراق دەکرێن و پلانێکى دوورمەودا هەیە، عێراق بەشێکى پارەى فڕۆکەکان بدات و بەشێکى دیکەى پارەکەش دیاریى ویلایەتە یەکگرتووەکانى ئەمریکا دەبێت.
گوتەبێژى حکومەتى عێراق، ئاماژەى بەوەشکرد، رێککەوتن کراوە بۆ کۆتایهێنان بە کارى سەکۆى ئەلیکترۆنى ناردنە دەرەوەى پارە لە کۆتایى ئەمساڵدا و پشت بە بانکە مۆڵەتپێدراوەکانى عێراق دەبەسترێت بۆ رێکخستنى پەیوەندیی لەگەڵ بانکەکانى دەرەوە.
دووپاتیشیکردەوە، لە دیدارەکەى سودانى و بایدن، باس لە هەڵگرتنى گەمارۆى سەر بانکە عێراقییەکان و کشانەوەى هێزەکانى هاوپەیمانى نێودەوڵەتى لە عێراق کراوە.