کەناڵ8 زانیوویەتى "بەمەبەستى گفتوگۆکردن لەبارەى بەبانکیکردنى مووچەى فەرمانبەران لە رێگەى پرۆژەى "هەژمارى من" سبەینێ حکومەتى هەرێمى کوردستان بڕیاردەدات شاندێک بۆ بەغداد بنێرێت".
بەگوێرەى زانیاریەکان، سبەینێ ئەنجوومەنى وەزیرانى هەرێمى کوردستان کۆدەبێتەوە و وەزیرى دارایی، راپۆرتێک لەبارەى دوایین گفتوگۆکانى نێوان هەرێمى کوردستان و حکومەتى فیدراڵ و داواکاریى بەغداد بۆ رادەستکردنى داهاتە نەوتى و نانەوتییەکان و پرۆژەى بەبانکیکردنى مووچەى مووچەخۆرانى هەرێمى کوردستان پێشکەشدەکات.
پرسی بە بانکیکردنی مووچەى فەرمانبەرانى هەرێمی کوردستان، بووەتە مژارى گەرمى گفتوگۆى نێوان بەرپرسانى دارایی نێوان وەزارەتى دارایی هەرێمى کوردستان و وەزارەتى دارایی حکومەتى فیدڕاڵ.
سۆران عومەر، ئەندامی ئەنجوومەنى نوێنەرانى عێراق بە کەناڵ8ى راگەیاند،هەرسێ بانکى حکومەتى فیدراڵى رەشید، رافیدەین، TBI رێگەپێدراون بۆ بەبانکیکردنى مووچەى مووچەخۆران و حکومەتى عێراق رەزامەندى ئەوەشى نیشانداوە کە دواتر لەرێگەى بانکەکانى هەرێمى کوردستانەوە مووچە دابەشبکرێت. بەڵام تا ئێستا حکومەتى هەرێمی کوردستان بێدەنگی هەڵبژاردووە و هیچ وەڵامێکی نەداوەتەوە".
دەشڵێت "ئەوەى لەم بابەتە بێدەنگە حکومەتى هەرێمى کوردستانە و ئەوەش لەبەرژەوەندى مووچەخۆرانى هەرێمى کوردستان نییە".
هاوکات فازڵ نەبى، بریکارى پێشووترى وەزیرى دارایی عێراق لە بوڵتەنى هەواڵەکانى کەناڵ8 رایگەیاند، پێویستە شاندێکى بریاربەدەست لەرووى سیاسى و حکومى بچێتە بەغداد بۆئەوەى گفتوگۆ لەسەر پرۆژەى بەبانکیکردنى مووچەى مووچەخۆران بکات.
