قوباد تاڵەبانی، جێگری سەرۆکوەزیرانی هەرێمی کوردستان لەگەڵ جێنین پلاسخارت، نوێنەری تایبەتی سکرتێری گشتیی نەتەوەیەکگرتووەکان لە عێراق کۆبووەوە و رایگەیاند، دواخستن و پەکخستنی هەڵبژاردن زیانی قەرەبوونەکراو بە پێگەی هەرێمی کوردستان و دامەزراوەکانی دەگەیەنێت.
لەکۆبوونەوەکەدا قوباد تاڵەبانی ئاماژەی بەوەکردووە، "پێشتر هۆشداریماندابوو کە هەر هەنگاو و هەوڵێک بۆ دواخستن یان پەکخستنی پرۆسەی هەڵبژاردن زیان بە پێگەی هەرێمی کوردستان و شەرعییەتی دامەزراوەکانی هەرێم دەگەیەنێت".
ئاماژەی بەوەشکردووە، "پێویستە هەڵبژاردن لە وادەی خۆیدا بەڕێوەبچێت و داهاتووی هەرێمی کوردستان و ژیان و گوزەرانی هاوڵاتییان لە چارەنووسێکی نادیاردا نەهێڵدرێتەوە".
جێگری سەرۆکوەزیران جەختیلەوەشکردووەتەوە، "هەڵوێستیان سەبارەت بە پێویستیی بەڕێوەچوونی هەڵبژاردن لە وادەی خۆیدا ڕوونە و لە نیگەرانیانەوە بەرامبەر بە داهاتووی هەرێم سەرچاوەی گرتووە".