
بەڕێوەبەرایەتیی گشتیی بەرگریی شارستانیی عێراق ڕایگەیاند، بەهۆی هاتنی بڕێکی دیکە لە ئاوی سەرڕێژبووی بەنداوەکانی تورکیا لە ڕێگەی خاکی سووریاوە بەرەو عێراق، تیمەکانیان خراونەتە حاڵەتی ئامادەباشییەوە. هاوکات هۆشداریی توند دەدرێتە ئەو هاووڵاتییانەی لە نزیک ڕووباری فورات نیشتەجێباون یان پڕۆژەیان هەیە.
بەڕێوەبەرایەتیی گشتیی بەرگریی شارستانیی عێراق ڕایگەیاند، ئاگادارکراونەتەوە کە بڕێکی دیکە لە ئاوی سەرڕێژبووی بەنداوەکانی تورکیا بە خاکی سووریادا بەرەو عێراق دێت، بۆیە تیمەکانیان خراونەتە حاڵەتی ئامادەباشی و هۆشداریش بە هاووڵاتییانی نیشتەجێی نزیک ڕووباری فورات دەدریت.
نەواس سەباح، بەڕێوەبەری ڕاگەیاندن لە بەڕێوەبەرایەتیی گشتیی بەرگریی شارستانیی عێراق ڕایگەیاندووە، ئاگادارکراونەتەوە کە بڕێکی دیکە لەو ئاوەی لە بەنداوەکانی تورکیاوە سەرڕێژبووە، ئێستا گەیشتووەتە نێو خاکی سووریا و بەرەو عێراق دێت، بۆیە لەو ناوچانەی مەترسییان لەسەرە، لە ئامادەباشیدا دەبن و هاووڵاتییانیان لێ ئاگادارکردووەتەوە.
گوتیشی، ڕێکارەکان بە هاوبەشی لەگەڵ وەزارەتی سەرچاوەکانی ئاو و پۆلیسی ئەنبار بەڕێوەدەچن و 24 کاتژمێر چاودێریی ئاستی ئاوی ڕووبارەکە دەکرێت، ئەو ناوچانەش مەترسییان لەسەرە، شاری ڕاوە، شارۆچکەی قائیم، شارۆچکەی هیت، شارەدێی ڕومانە و شارۆچکەی حەدیسەن.
ناوبراو جەخت دەکاتەوە، ئەوانەی کە پێویستە زۆر ئاگادار بن ئەو کەسانەن کە لە ڕۆخی ڕووباری فورات نیشتەجێ بوون یاخود پڕۆژەیان هەیە، وەک ڕێکارێکی خۆپارێزیش هاتوچۆکردن لە هەردوو پردی ناو شارەدێی عوبەیدی ڕاگیراوە.
ئەمە شەپۆلی دووەمی ئاوی سەرڕێژبووی بەنداوەکانی تورکیایە و پێشتر لە سووریا ئەم ئاوە بووە هۆی بەرزبوونەوەی ئاستی ڕووباری فورات و 4 قوربانیی لێکەوتەوە.




