
پێشبینى دەکرێت وەرزى پایزى ئەمساڵى عێراق وەرزێکى باراناویى بێت و لە ناوچەکانى هەرێمى کوردستان و ناوەڕاست، زیاتر لە ئاستى ئاسایی، باران ببارێت.
سەنتەرى ئەورووپى بۆ پێشبینییە مەودا مامناوەندەکانى کەشوهەوا لە جیهان، پێشبینى کردووە، وەرزى پایزى ئەمساڵى عێراق، وەرزێکى باراناوى و شێدار بێت و لە مانگەکانى 10 و 11 و 12دا بڕێکى زۆرى باران ببارێت.
ئاماژەى بەوەشکردووە، بە گوێرەى نموونە ژینگەییەکان، عێراق لەناو ئەو ناوچانەدایە کە ئەگەرى هەیە زیاد لە ئاستى ئاسایی بارانیان لێ ببارێت، بەتایبەت لە ناوچەکانى هەرێمى کوردستان و ناوەڕاست، ئەوەش ڕۆڵى دەبێت لە باشکردنى دۆخى دابینکردنى ئاو، ئەگەر کەشى ژینگەیى لە وەرزى پایزدا لەبار بێت.
شارەزایانى بوارى کەشوهەوا دووپاتیانکردووەتەوە، پێشبینییەکانى کەشوهەوا پشت بە نموونەکانى کەشوهەوا و ئامارە دوور مەوداکان دەبەستن، ئەوەش واتاى بارانبارینى بەخوڕ و بەردەوام ناگەیێنێت، بەڵکو ڕەنگدانەوەى بەرزى ئەگەرەکانى تۆمارکردنى وەرزێکى باراناوى باشترە، بەراورد بە ساڵانى ئاسایی.
پێشبینییەکانى کەشوهەوا، ڕووبەرێکى فراوان لە تورکیا و سووریا و دوورگەى عەرەبى و ئێران دەگرێتەوە، ئەوەش چالاکى نزمە پاڵەپەستۆ لە وەرزى پایز و سەرەتاى وەرزى هاوین بەهێز دەکات و ئەگەرەکانى بارانبارین لە ناوچەکەدا زیاد دەکات.
