لەسەر ڕێگەى کەرکووک بارهەڵگرێک ئیستۆپى نەما و خۆی کرد بە بازگەی چیمەندا و بەر ژمارەیەک ئۆتۆمبێل کەوت و زیانى پێگەیاندن.

لە سلێمانییەوە بەرەو کەرکووک ڕۆێشتووە

پەیامنێرى کەناڵ8 گوتى "بارهەڵگرەکە لە سلێمانییەوە بەرەو کەرکووک ڕۆیشتووە و بەهۆى تەقینى برێکەکەى خۆی کردووە بە بازگەی چیمەندا و دواتر خۆى بە سێ ئۆتۆمبێلى دیکەدا کێشاوە لە نزیک بازگەکە ڕاگیرابوون".

شۆفێری بارهەڵگرەکە بریندارە

ئاماژەى بەوەشکرد، لە ڕووداوەکەدا شۆفێرى بارهەڵگرەکە بریندار بووە و ڕەوانەى نەخۆشخانە کراوە و تەندروستى جێگیرە، کە لە دایکبووى 1970 ـە و خەڵکى بەغدادە.

ڕاشیگەیاند، دواى ڕووداوەکە تیمەکانى بەرگریى شارستانى گەیشتوونەتە شوێنى ڕووداوەکە و لێکۆڵینەوەیان دەستیپێکردووە.

ڕووداوەکەی مانگی نیسانی ڕابردوو

ڕۆژى 26ـى نیسانى 2026 بارهەڵگرێک لە کەرکووک کۆنتڕۆڵى لەدەستدا و خۆى کێشا بە ژمارەیەک ئۆتۆمبێل بەهۆى ڕووداوەکەوە شەش کەس گیانیان لەدەستدا و 27ـى کەسى دیکە برینداربوون و 35 ئۆتۆمبێلیش زیانیان پێگەیشت.

بەگوێرەى ئامارەکان لەسەرەتاى ئەمساڵەوە لە کەرکووک تاوەکو ئێستا زیاتر لە 55 کەس گیانى لە دەستداوە و زیاتر لە 200 کەسیش برینداربوون.