شاندی وەزارەتی شەهیدان دۆسیەی زیندانیانی سیاسی دەباتە بەغداد

پووختەی هەواڵەکە:

شاندی وەزارەتی کاروباری شەهیدان بۆ تەواوکردنی هاوتاکردنی شایستە داراییەکان دەچێتەوە بەغداد.

شاندەکە هەوڵدەدات تەرخانی دارایی لە پڕۆژەیاسای بودجەی 2027ـی عێراقدا جێگیر بکات.

دۆسیەی 25 هەزار و 868 زیندانیی سیاسی بۆ هاوتاکردن ڕادەستی دەستەی عێراقی کراوە.

مینحەی مانگانەی زیندانیانی سیاسی بەپێی یاسای عێراق لە نێوان 400 هەزار بۆ 1.2 ملیۆن دینار دەبێت.

زانیارییەک گەیشتووەتە کەناڵ8 کە دۆسیەی هاوتاکردنی مینحەی زیندانیانی سیاسیی هەرێمی کوردستان لەگەڵ بەغداد بەهۆی نەبوونی تەرخانی دارایی هێشتا یەکلانەکراوەتەوە؛ لە کاتێکدا شاندێکی فەرمی ئامادەکاری بۆ گەشتکردنەوە بۆ بەغداد دەکات تا پشکی ئەم توێژە لە بودجەی 2027 جێگیربکرێت، چارەنووسی دارایی زیاتر لە 42 هەزار زیندانیی سیاسی بەستراوەتەوە بە ڕێککەوتنی کۆتایی نێوان هەردوولا.

ئەحمەد مام ڕەسوڵ، بەڕێوەبەری کاروباری زیندانییانی سیاسی لە وەزارەتی شەهیدان و ئەنفالکراوان ڕێکارە فەرمییەکانی بەمشێوەیە خستەڕوو:

ئاڕاستەکردنی نووسراوی فەرمی بۆ ئەنجوومەنی وەزیران بە مەبەستی وەرگرتنی ڕەزامەندی بۆ سەردانیکردنەوەی بەغداد.

بەردەوامبوونی پڕۆسەی هاوتاکردن و تەواونەبوونی ڕێکارە کارگێڕییەکانی گواستنەوەی دۆسیەکان بۆ دەسەڵاتی فیدراڵ.

دانوستاندن لەگەڵ وەزارەت و دامەزراوە پەیوەندیدارەکانی عێراق بە ئامانجی جێگیرکردنی شایستەکان لە پڕۆژەیاسای بودجەی 2027.

بەدواداچوون بۆ دۆسیەی ئەو 25,868 زیندانییە سیاسییەی کە لە کۆتایی مانگی حوزەیراندا بە فەرمی ڕادەستی دەستەی زیندانیانی عێراق کراون.

بڕیاری دادگا:

بەهادین عەزیز، سەرۆکی کۆمکاری زیندانییە سیاسییەکانی کوردستان جەخت لەسەر جێبەجێکردنی دەقی ڕێککەوتنەکە دەکاتەوە بەپێی یاسای عێراق؛ بە جۆرێک مینحەی مانگانە بۆ ئەو کەسانەی لە سەرووی ساڵێک زیندانی بوون دەبێتە 1,200,000 دینار، بۆ سەرووی شەش مانگ دەبێتە 800,000 دینار و بۆ خوار شەش مانگ 400,000 دینار دەبێت، هاوکات ڕوونیکردەوە کە لە کاتێکدا دۆسیەی 25,868 زیندانی لە هەرێم پشتڕاستکراوەتەوە و پێویستی بە وردبینیی نوێ نییە، هێشتا 17,000 دۆسیەی دیکە پێویستیان بە بڕیاری دادگا هەیە تا لە قۆناغەکانی داهاتوودا سوودمەند بن.

زانیاریی زیاتر بۆ تۆ:

ئەحمەد مام ڕەسوڵ: سەرۆککۆمار پاڵپشتى گواستنەوەى دۆسییەى زیندانیانى سیاسى هەرێم بۆ بەغداد دەکات

وەزارەتی دارایی هەرێم: مووچە و ئیمتیازاتی زیندانیانی سیاسی هاوتای عێراق دەکرێت

زیندانیانی سیاسیی: سەردانمان بۆ بەغداد بۆ پەلەکردنە لە هاوتاکردنی مینحەکانمان