زەیدی بەشداریی کۆبوونەوەی نەتەوەیەکگرتووەکان دەکات و لەگەڵ ترەمپ کۆدەبێتەوە

پووختەی هەواڵەکە

عەلی زەیدی هەفتەی داهاتوو سەردانی ئەمریکا دەکات و لەگەڵ دۆناڵد ترەمپ و سەرکردەکانی دیکەی جیهان کۆدەبێتەوە.

گوتەبێژی حکومەت 30ـی ئەیلول وەک وادەیەکی گرنگ بۆ سەروەری و دەستپێکردنی هاوکاریی ئابووریی درێژخایەن ناودەبات.

ئەم سەردانە هاوکاتە لەگەڵ بڕیاری کشانەوەی تەواوەتیی هێزە بیانییەکان لە عێراق و پرسی چەکداماڵینی گرووپە چەکدارەکان.

حەیدەر عەبودی، گوتەبێژی حکومەتی عێراق ڕایگەیاندووە کە هەفتەی داهاتوو عەلی زەیدی، سەرۆکوەزیرانی عێراق بە مەبەستی بەشداریکردن لە کۆبوونەوەکانی کۆمەڵەی گشتیی نەتەوەیەکگرتووەکان و دیداری لەگەڵ دۆناڵد ترەمپ، سەرۆکی ئەمریکا، سەردانی واشنتن دەکات.

کارنامەی سەردانەکەی سەرۆکوەزیرانی عێراق بۆ ئەمریکا

عەلی زەیدی لە چوارچێوەی سەردانەکەیدا بۆ واشنتن، لەگەڵ سەرۆکی چەندین وڵاتی جیهاندا کۆبوونەوە ئەنجام دەدات.

سەرۆکوەزیرانی عێراق بەشداری لە کۆبوونەوەی ژووری بازرگانیی ئەمریکادا دەکات بۆ بەردەوامیدان بە پەیوەندییە ئابووری و بازرگانییەکان.

ڕۆژی 30ـی ئەیلول وەک وەرچەرخانێکی گرنگ بۆ سەروەریی عێراق دەستنیشانکراوە و پەیوەندییەکان لەگەڵ واشنتن دەگۆڕێن بۆ هاوکاریی ئابووریی درێژخایەن.

لە 30ـی ئەم مانگەدا ئەرکی هێزەکانی هاوپەیمانان لە عێراق کۆتایی دێت و سەرجەم هێزە بیانییەکان بە تەواوەتی لەو وڵاتە دەکشێنەوە.

دۆسیەی کشانەوەی هاوپەیمانان و چەکداماڵینی گرووپەکان

سەردانەکەی سەرۆکوەزیرانی عێراق لە کاتێکدایە کە واشنتن لە ماوەی ڕابردوودا گوشاری لە حکومەتەکەی زەیدی کردووە تاوەکو لە وادەی کشانەوەی هێزە بیانییەکاندا، گرووپەکانی بەرەی مقاوەمە ناچار بکات چەکەکانیان ڕادەستی حکومەت بکەن، ئەمەش هاوکاتە لەگەڵ ئامادەکارییەکان بۆ گۆڕینی شێوازی پەیوەندییەکانی نێوان هەردوو وڵات لە بواری سەربازییەوە بۆ هاوبەشیی ئابووری.

زانیاریی زیاتر لەسەر بابەتەکە

یەکەم سەردانی دەرەکیی عەلی زەیدی دوای وەرگرتنی پۆستەکەی بۆ واشنتن بوو لە 13ـی تەمموزدا، کە لە 14ـی هەمان مانگ لە کۆشکی سپی لەگەڵ دۆناڵد ترەمپ کۆبووەوە؛ لەو سەردانەدا کە بە پلەی یەکەم ئابووری و بازرگانی بوو، 48 ڕێککەوتننامە لە بوارەکانی نەوت، وزە، تەکنەلۆجیا، و کەرتی بانک و دارایی لەنێوان عێراق و کۆمپانیا ئەمریکییەکاندا واژۆکران.

زانیاریی زیاتر بۆ تۆ

عەبودی: عێراق ڕێگەی نەداوە هێرش بکرێتەسەر هیچ گرووپ و لایەنێک

لە واشنتنەوە بۆ تاران و ئێستاش ئەنقەرە و ڕیاز؛ جوڵە نوێیەکانی عەلی زەیدی لە ناوچەکە