نوێنەرانی ژنانی هەر چوار پارچەی کوردستانن و بۆ یەکدەنگیی ژنانی کورد لە سلێمانی کۆبوونەوە.
کۆبوونەوەکە تەنیا بۆ گفتوگۆکردن لەسەر پرسەکانی ژنان نەبوو.
هەوڵێکە بۆ نزیککردنەوەی دید و بەهێزکردنی یەکڕیزیی ژنانی کورد لە ئاستێکی نەتەوەییدا.
پلاتفۆرمی یەکێتیی نەتەوەیی ژنی کورد کۆبوونەوەکەی ڕێکخست، بۆ ئەوەی لەبارەی دۆخی سیاسیی ناوچەکە، کێشە و پرسەکانی ژنان و چۆنیەتیی بەهێزکردنی هاوئاهەنگی لەنێوان ژنانی هەر چوار پارچەی کوردستان گفتوگۆ بکرێت.
سلێمانی و باشووری کوردستان هەمیشە ماڵی هەر کوردێکە لە هەر پارچەیەکی دیکەی کوردستان بێت.
دەتوانین بڵێین ئەوان ئەمڕۆ لێرە لە ماڵی خۆیانن نەک ئەوەی میوان بن.
هەست دەکەم لێرە دەرفەتەکە گونجاوترە بۆ بەستنی ئەو کۆنگرەیە لە ڕووی سیاسییەوە.
کاتێک باسی ئاشتی دەکرێت، کاتێک باسی چارەسەری و دیموکراتیزەبوون دەکرێت، لەم بوارەدا ڕۆڵی ژنان زیاتر دەردەکەوێت.
خەڵکی هەر چوار پارچەی کوردستان لە دەرەوەی وڵات لە هەر کوێیەک بژین، واتە هاوفکربوون لە نێوان ژناندا زۆر گرنگە و گفتوگۆی زۆر تایبەتیش دەربارەی چارەنووسی ژنان هەیە.
یەکێک لە بابەتە سەرەکییەکانی ئەم کۆبوونەوەیە گفتوگۆکردن بوو لەبارەی بەستنی سێیەمین کۆنگرەی نەتەوەیی ژنی کورد، کە چاوەڕوان دەکرێت لە ئایندەیەکی نزیکدا ببەسترێت و ببێتە دەرفەتێک بۆ دیاریکردنی ئاراستە و هەنگاوە هاوبەشەکانی ژنانی کورد و ئەرک و ڕۆڵیان لە قۆناغی ئێستادا.
هەر پارچەیەکی کوردستان تایبەتمەندیی جیاوازی هەیە.
خەباتی هەر پارچەیەک جیاوازە، بەڵام چەندەش پارچەکانمان تایبەتمەندیی جیاوازیان هەبێت، ڕۆحی یەکێتی کاتێک ئەم خەباتە بەرەو پێش دەبات، هەموو پارچەکانمان دەتوانن مافەکانی خۆیان زیاتر و زووتر مسۆگەر بکەن.
ئێمەش وەک پلاتفۆرمی ژنانی کورد دەمانەوێت کە چۆن پێشەنگیی خەباتی کۆمەڵایەتی، زیاتر بە پێشەنگیی ژنان بەڕێوەبچێت.
ئێمە هەر کاممان سەر بە فکر و ئایدیۆلۆژیایەک دەبین، سەر بە لایەنێک دەبین، بەڵام هیچ شتێک لەو جیاوازییانە ناتوانێت پێش بە یەکێتیی نەتەوەیی بگرێت.
داخوازییەکە ئەوەیە؛ ژنان پرسی ئازادیی ژن، پرسی دیموکراسی و ئازادیی نەتەوە بخەنە پێش پرسی جیاوازیی حیزبی.
کۆبوونەوەی نوێنەرانی ژنانی هەر چوار پارچەی کوردستان لە سلێمانی، جارێکی دیکە پرسی یەکڕیزی و هاوئاهەنگیی ژنی کورد دەخاتەڕوو؛ بەڵام ئەوەی گرنگە، ئەوەیە ئەم گفتوگۆیانە تاوەکو چەند دەتوانن ببنە بڕیار و هەنگاوی کردەیی، بەتایبەتی لە ڕێگەی بەستنی سێیەمین کۆنگرەی نەتەوەیی ژنی کوردەوە.
