دیمانەکە لە بارەى داخستنى دەروازە سنوورییەکان بووە.
فوئاد حسێن قسەى لەسەر چەکى گرووپەکان کردووە.
قسەکانى وەزیرى دەرەوەى عێراق کاردانەوەى گەورەى لێکەوتەوە.
دیمانەیەکى ڕۆژنامەوانیى فوئاد حسێن، وەزیرى دەرەوەى عێراق، لە بارەى داخستنى دەروازە سنوورییەکان و چەکى گرووپەکان، هێزە عێراقییەکان بە گشتى و گرووپە چەکدارەکان بە تایبەت توڕە دەکات و داواى هەڵوێست لە حکومەتى عێراق دەکەن.
واشنتن داواى لە عێراق کردووە، سەرجەم دەروازە سنوورییەکانى لەگەڵ ئێران دابخات.
تەنیا دوو دەروازەیان بمێنێتەوە.
فراکسیۆنى بەدر لە ئەنجوومەنى نوێنەران: داواکاریى ئەمریکا بۆ داخستنى دەروازەکان بە هەموو جۆرێک ڕەتدەکەینەوە.
لێدوانەکانى وەزیرى دەرەوەى عێراق، پێچەوانەى پاساوەکانى پێشووە بۆ داخستنى دەروازەکان.
ئەجێندایەک لە ئارادایە بۆ کردنە ئامانجى باشوور و دەستوەردان لە بڕیارى سەروەرى.
فراکسیۆنى بەدر: عێراق وڵاتێکى خاوەن سەروەرییە و سیاسەتى گەمارۆ و برسیکردنى گەلان ڕەتدەکاتەوە.
بەردەوامیى داخستنى دەروازەکان بە تایبەت دەروازەى شەیب، زیانى بە گوزەران و ئابوورى هاوڵاتییان گەیاندووە.
فراکسیۆنى بەدر: داوا لە حکومەت دەکەین، پێداچوونەوەى دەستبەجێ بکات و دەروازەکان بکاتەوە.
کەتیبەکانى سەیدولشوهەدا قسەکانى فوئاد حسێن لە بارەى ڕازیبوون بە کۆنتڕۆڵکردنى چەک ڕەتکردەوە.
ئەبوئالاء وەلائى: فوئاد حسین لە لێدوانەکەیدا ورد نەبووە.
گرووپەکان: بەڵگەنامەى ڕێککەوتنى سەروەرییان واژۆکردووە.
چوار گرووپ و چوارچێوەى هەماهەنگى و سەرۆکوەزیران واژۆیان لەسەر کردووە.
گرووپەکان: هێشتا پابەندن بە بەندەکانى ڕێککەوتننامەکە.
بەڵام لە پەیوەست بە چەک هیچ هەڵوێستێکیان ڕانەگەیاندووە.
فراکسیۆنى مونتەسیرون: بەزاندنى سەروەریی نیشتمانى و دەستتێوەردانێکى ئاشکراى ئەمریکا لە بڕیارى نیشتمانى ناوبرد.
تەنیا دوو گرووپ ماون چەک ڕادەستبکەن، سەرۆکوەزیرانیش لە کۆبوونەوەى چوارچێوەى هەماهەنگى هۆشداریی داوەتە هەردوو گرووپەکە، ئەگەر جەنگى ئەمریکا و ئێران دەستپێبکاتەوە و دەستتێوەردان بکەن، ڕێکارى یاسایی توند لە دژیان دەگرێتەبەر.
هەوڵەکانى حکومەتى عێراق بۆ نزیکبوونەوە لە ئەمریکا، هێزەکانى نزیک لە ئێرانى نیگەران کردووە و بڕوایان وایە، ڕێکارەکانى حکومەت بە تایبەت داخستنى دەروازەکان لەگەڵ ئێران، ئاماژەیە بۆ ئەوەى عێراق بێلایەنى لەدەستداوە.
فوئاد حسێن: ئەمریکا داواى لێکردووین تەنیا دوو دەروازە لەگەڵ ئێران بەکراوەیی بهێڵینەوە