شارەوانیی سلێمانی رایگەیاند، بەشێک لە داهاتی تۆمارکردنی خانووە زیادەڕۆکان لە سنووری سلێمانی دەخرێتەوە خزمەت گەڕەکەکانیان.

سەرۆکایەتیی شارەوانیی سلێمانی لە روونکردنەوەیەکدا بڵاویکردەوە، پاڵپشت بە ماددەی 7/دووەم لە یاسای ژمارە 3ـی ساڵی 2019ـی هەموارکراو بە یاسای ژمارە 7 ساڵی 2021  تایبەت بە تۆمارکردنی خانووە زیادەڕۆکان، رێژەی 30٪ داهاتی بەدەستهاتوو لە تۆمارکردنی ئەو خانووانە خەرجدەکرێتەوە بۆ گەڕەکەکانیان.

ئاماژەی بەوەشکردووە، لە بەرژەوەندیی هاوڵاتییانی سوودمەندە و سەرەڕای ئەوەی وێنەی تۆماری خانووەکانیان پێدەبەخشرێت، لەهەمان کاتدا سوودمەند دەبن لەو خزمەتگوزارییانەی لە رێگەی شارەوانییەکانیانەوە پێشکەش بە گەڕەکەکانیان دەکرێت لەو بڕە داهاتەی لەسەرەوە ئاماژەی پێکراوە.

شارەوانیی سلێمانی دەڵێت: هیوادارین بتوانین زۆرترین خزمەتگوزاری بگەیەنینە ئەو گەڕەکانە.