قوباد تاڵەبانی لەگەڵ کونسوڵ و نوێنەرانی باڵای سێ وڵاتی ئەوروپی کۆبووەوە
لە کۆبوونەوەکەدا دۆخی سیاسی ناوخۆی هەرێمی کوردستان و هۆکاری ناکۆکی نێوان لایەنە سیاسییەکانی تاوتوێکراون.
بەپێی ڕاگەیەندراوێکی فەرمی، کۆبوونەوەکەی قوباد تاڵەبانی لەگەڵ هەریەکە لە کریستیان ئۆلفکە، کونسوڵی گشتیی ئەڵمانیا، ئیمانوێل مینیۆ، کونسوڵی گشتیی فەڕەنسا، و ئێستەر لوفن، کونسوڵی گشتیی هۆڵەندا بە وەکالەت بەڕێوەچووە.
قوباد تاڵەبانی هۆکار و ڕەهەندەکانی ناکۆکییە سیاسییەکانی ناوخۆی هەرێمی کوردستانی بۆ دیپلۆماتکارە ئەوروپییەکان ڕوون کردووەتەوە.
تیمی یەکێتیی نیشتمانیی کوردستان لە حکومەتی کاربەڕێکەری هەرێم، پابەندبوونی تەواوەتی خۆی بە جێبەجێکردنی بڕیارەکانی ئەنجوومەنی سەرکردایەتیی یەکێتی دووپات کردووەتەوە.
ئەم کۆبوونەوەیە لە کاتێکدایە ، ناکۆکییەکان پارتی و یەکێتیی لەسەر پرسی کۆبوونەوەی پەرلەمان و دیاریکردنی دەستەی سەرۆکایەتی گەیشتووەتە لوتکە و بەوهۆیەوە ئەنجوومەنی سەرکردایەتی یەکێتی و بافڵ تاڵەبانی سەرۆکی یەکێتیی نیشتمانیی کوردستان بڕیاری کشانەوەی تیمی یەکێتییان لە حکومەتى کاربەرێکەری پارتی لە هەولێر دەرکرد.
