گوتەبێژى وەزارەتى دارایى و ئابووریى حکومەتى هەرێمى کوردستان راگەیاند، "لیستى مووچەى مانگى ئازاریان رەوانەى بەغداد کردووە لەرێگەى ئۆنلاینەوە".
هونەر جەمال، گوتەبێژى وەزارەتى دارایى و ئابووریى حکومەتى هەرێمى کوردستان بە کەناڵ8ـى گوت، "لیستى مووچەى مانگى ئازار کە رەوانەی بەغداد کراوە، هاوپێچى پلە بەرزکردنەوەى لەگەڵدا نییە، چونکە ئەو لیستەى ئامادەدەکرێت بە پلەبەرزکردنەوەوە هێشتا تەواونەبووە".
وەزارەتى دارایى و ئابوورى حکومەتى هەرێمى کوردستان، بۆ دابینکردنى مووچەى یەک مانگ پێویستى بەبڕى 949 ملیار دینارە و ژمارەى مووچەخۆران یەک ملیۆن و 180 هەزار کەسە.
رەوانەکردنى مووچەى مانگى ئازار بۆ بەغداد لەلایەن وەزارەتى دارایى و ئابوورى حکومەتى هەرێمى کوردستانەوە لەکاتێکدایە، ئەمڕۆ دووشەممە 1ـى نیسانى 2024 سێیەم رۆژى دابەشکردنى مووچەى مانگى شوباتى مووچەخۆرانى هەرێمى کوردستانە.
بەگوێرەى ئەو خشتەیەى راگەیەندراوە، تاوەکو کۆتایى ئەم هەفتەیە سەرجەم وەزارەت و دەستە و فەرمانگەکان مووچەى مانگى شوبات وەردەگرن.
