فەرماندەیی ناوەندی هێزەکانی ئەمریکا (سێنتکۆم) راگەیەندراوێکی لەبارەی چالاکییەکانی سێ مانگی رابردووی بڵاوکردەوە و ئاماژە بەوەدەکات، لە سێ مانگی رابردوودا 94 چالاکیمان بۆ تێکشکاندنی داعش ئەنجامداوە و 18 ئەندامی رێکخراوەکە کوژراون.
سێنتکۆم لە راگەیەندراوەکەدا دەڵێت، "ئەمریکا و هێزە هاوپەیمانەکانی بە هاوکاری هێزەکانی عێراق و هێزەکانی سووریای دیموکرات، لە کانوونی دووەمەوە تاوەکو ئازاری 2024 لەسەر خاکی عێراق و سووریا 94 چالاکی بۆ تێکشکاندنی داعش ئەنجامداوە، 18 ئەندامی داعش کوژراون و 63ی دیکەش بەدیلگیراون".
ئەوەی تایبەتە بە چالاکییەکانی سێنتۆکم لە عێراق، راگەیەندراوەکە ئاماژەی بەوەکردووە، "66 مانۆڕمان ئەنجامداوە و تیایدا 11 ئەندامی داعش کوژراون و 36 ئەندامی دیکەش بەدیلگیراون".
دەشڵێت، "لە سێ مانگی رابردوودا لە عێراق و سووریا دوو هەزار و 500 چالاکی تۆمارکراوە کە بەهۆیەوە توانراوە نۆ هەزار راگیراوی داعش بگەڕێنرێنەوە بۆ زیندانەکانی داعش لە سووریا و رادەستکردنیان بە کەمپی هۆڵ، بە ئامانجی دووبارە راهێنانەوەیان بۆ ناو کۆمەڵگە".
_