کەشناسیی هەرێمی کوردستان رایگەیاند، ئەمڕۆ لە هەندێک لە ناوچەکان ئەگەری تاوەباران و خۆڵبارین دەبێت.
بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان پێشبینیی کەشوهەوای 48 کاتژمێری داهاتووی بڵاوکردەوە و ئاماژەی بەوەکردووە، ئەمڕۆ دووشەممە 15ـی نیسانی 2024، ئاسمانی هەرێمی کوردستان هەور بۆ نیمچەهەور دەگۆرێت و ئەگەری تاوەباران و بروسکە هەیە لە ناوچەکانی رۆژئاوای هەرێمی کوردستان بە تایبەت ناوچە سنووریەکان و قەزای شەنگال و دەوروبەری و لە هەندێک لە ناوچەکانی پارێزگای دهۆک.
بە گوێرەی پێشبینیی کەشناسی، ئەمڕۆ ئەگەری بەرزبوونەوەی تۆزێکی سووک لە ناوچەکانی باشوور و رۆژئاوای هەرێمی کوردستان هەیە و لەکاتەکانی شەودا کەشەکە جێگیردەبێتەوە و ئاسمان بەرەو ساماڵ دەگۆرێت.
هاوکات دیلان رەشاد، گوتەبێژی وەزارەتی گواستنەوە و گەیاندنی هەرێمی کوردستان بە کەناڵ8ـی راگەیاند، شەپۆلێکی خۆڵبارین عێراقی گرتووەتەوە و لە پاشنیوەڕۆی ئەمڕۆوە کاریگەری ئەو خۆڵبارینە بە چڕی دەگاتە سەر ناوچەکانمان، بە تایبەت پارێگای کەرکوک و ئیدارەی گەرمیان، بەڵام لە سەنتەری لە سەنتەری پارێزگاکان کاریگەری کەمتر دەبێت و لە ماوەی 24 کاتژمێردا خۆڵبارینەکە کۆتایی دێت.
لەبارەی کەشوهەوای سبەی سێشەممە، کەشناسیی هەرێمی کوردستان دەڵێت: ئاسمان ساماڵ دەبێت لەگەڵ پەیدابوونی پەڵەهەوری جیاجیا، خێرایی با لەسەرخۆ دەبێت و پلەی گەرما 1 بۆ 3 پلە بەرزدەبێتەوە بەراورد بە ئەمڕۆ.