بەمەبەستى رووبەڕووبوونەوەى ئەو هەڕەشانەى لەسەر ئاسایشى وڵاتەکەیەتى، بنیامین نەتانیاهوو، سەرۆکوەزیرانى ئیسرائیل داواى یەکگرتوویى نیشتمانى وڵاتەکەى دەکات.
بەگوێرەى هەواڵێکى کەناڵى ئاى نیوز 24ـى ئیسرائیل، داواکارییەکەى بنیامین نەتانیاهوو بۆ یەکڕیزى نیشتمانی، لەمیانەى کۆبوونەوەکانى رۆژى پێنجشەممە 18ـى نیسانى 2024 دێت، لەگەڵ بەرپرسانى دەزگا ئەمنییەکانى ئیسرائیل.
سەرۆکوەزیرانى ئیسرائیل لە داواکەیدا هۆشداریداوە لە دابەشبوونى نێوخۆى وڵاتەکەى و رایگەیاندووە، "پێویستە جیاوازى و دابەشبوونەکانى ناوخۆى وڵات کۆتاییپێبێت، چونکە ئێستا رووبەڕووى هەڕەشەیەکى ئامادە بوونەتەوە، پێویستە هەموو هێزیان یەکبخەن".
هاوکات، رژدبوونى خۆى دووپاتکردەوە لە رووبەڕووبوونەوەى سەرجەم ئاڵنگارییەکان، بەتایبەتى زامنکردنى رزگاکردنى ئەو 100 بارمتەیەى لەلای چەکدارانى حەماس لە 7ـى تشرینى یەکەمى ساڵى رابردووەوە دەستبەسەرن.
نەتانیاهوو ئاماژەى بەوەشکرد، "ئەم ئەرکە گرنگە پێویستى بەدوو شتە، یەکەم ورەى بەرز و دووەمینیش یەکڕیزى پێویستە".
داواکارییەکەى سەرۆکوەزیرانى ئیسرائیل لەکاتێکدایە، ناوچەکە بە بارودۆخێکى دژوار و ئاڵۆزدا تێدەپەڕێت، بەتایبەتى دواى هێرشەکەى کۆمارى ئیسلامى ئێران بۆسەر ئیسرائیل.
