وەزیرى سامانە سروشتییەکانى هەرێمى کوردستان بەوەکالەت داوا لە ئەمریکا دەکات، هەوڵەکانى بۆ پاراستنى ژێرخانى وزە و ئابوورى هەرێمى کوردستان چڕبکاتەوە.
کەمال محەمەد، وەزیرى سامانە سروشتییەکان بە وەکالەت و مارک سترۆ، کونسوڵى گشتى ئەمریکا لە هەرێمى کوردستان کۆبوونەوە و گفتوگۆ لەبارەى هێرشە درۆنییەکەى سەر کێڵگەى گازى کۆرمۆر کرا.
کونسوڵى ئەمریکا لە کۆبوونەوەکەدا رایگەیاند، وڵاتەکەى بە توندى سەرکۆنەى هێرشەکەى سەر کۆرمۆر دەکات و بۆ رێگرى لەو هێرشە تیرۆریستییانە پاڵپشتى لە هەردوو حکومەتى هەرێمى کوردستان و عێراق دەکات.
گوتیشى، وەزارەتى دەرەوەى وڵاتەکەى لە نزیکەوە چاودێرى و بەدواداچوون بۆ گۆڕانکارییەکان دەکات و هەوڵەکانى بۆ پشتگیرى لە ئارامى و ئاسایشى هەرێمى کوردستان و رێگرتن لە بەزاندنى سەروەرى عێراق بەردەوام دەبێت.
هاوکات، وەزیرى سامانە سروشتییەکان بە وەکالەت رایگەیاند، جارى نۆیەمە هێرشدەکرێتەسەر کێڵگەى کۆرمۆر و زیان بە ئابووریى هەرێمى کوردستان و حکومەتى عێراق دەگەیەندرێت، داواشیکرد ئەمریکا هەوڵەکانى چڕبکاتەوە بۆ پاراستنى ژێرخانى وزە و ئابووریى هەرێمى کوردستان.
رۆژى 26ـى نیسان، بە درۆن هێرشکرایەسەر کێڵگەى گازى کۆرمۆر و بەهۆیەوە چوار کارمەند گیانیانلەدەستدا و ژمارەیەکى دیکەش برینداربوون.