پووختەى هەواڵ

• هێزە ئەمنییەکان لە قەرەهەنجیر ڕووبەڕووى چەند تۆمەتبارێک بوونەوە.

• پاش ڕووبەڕووبونەوەکە تۆمەتبارەکان دەستگیرکران و منداڵەکان ئازاد کران.

بەرەبەیانیی ئەمڕۆ لە شارەدێی قەرەهەنجیر هێزەئەمنیەکان ڕووبەرووی چەند کەسێک بوونەوە، کە دوو منداڵیان ڕفاندبوو، بەوهۆیەوە دەنگی تەقەیەکی زۆر بیسترا و دواتر منداڵەکان ڕزگار کران.

ئاوارە ئەحمەد، بەڕێوەبەری شارەدێی قەرەهەنجیر بۆ کەناڵ8:

• پاش ئاگادارکردنەوەی هێزە ئەمنییەکانی سنوورەکە، بەسەرپەرشتیی بەڕێوەبەری ناحیە، هەڵمەتێک بۆ دەستگیرکردنی چەند کەسێک کرا کە تۆمەتباربوون بەڕفاندنی دوو منداڵ.

• لە هەڵمەتەکەدا هێزەکانی پۆلیس و ئاسایش لە شارەدێی قەرەهەنجیر بەشداربوون.

• ئەو دوو منداڵەشی ڕفێنرابوون خەڵکى پارێزگای کەرکووک بوون.

• زانیاریی پێشوەختە هەبووە لەسەر تۆمەتبارەکان و لەکاتی گەیشتنیان بە قەرەهەنجیر، ئاشکرابوون.

• هەوڵیانداوە لە سەنتەری شارەکە خۆیان بشارنەوە و لەدەستی هێزەئەمنییەکان هەڵبێن.

وەک بەڕێوەبەرى شارەدێى قەرەهەنجیر دەڵێت، هەرچەندە ڕووبەڕووبونەوە ڕوویدا، بەڵام سەرئەنجام توانراوە سەرجەم تۆمەتبارەکان دەستگیربکرێن کە ژمارەیان چوار کەس بوو و هیچ زیانێکی گیانی لەڕووداوەکەدا نەبووە و منداڵەکانیش پاش ڕزگارکردنیان ڕادەستی پۆلیسی کەرکووک کراونەتەوە.