شاندی هەرێمی کوردستان بۆ نووسینەوەی بودجەی 2027 دەچێتە بەغداد
پووختەی هەوالەکە:
- شاندێکی باڵای دارایی هەرێمی کوردستان بۆ بەشداریکردن لە نووسینەوەی بودجەی 2027 دەچێتە بەغداد.
- هەرێمی کوردستان داوای نزیکەی 29 تریلیۆن دینار وەک پشکی خۆی لە پڕۆژەیاساکەدا دەکات.
- زیاتر لە 23.5 تریلیۆن دینار بۆ مووچە، خانەنشینی و پلەبەرزکردنەوەی فەرمانبەران دیاریکراوە.
- داواکاریی بەهەمیشەییکردنی 60 هەزار گرێبەست و دامەزراندنی سێ یەکەمەکان لە ڕەشنووسەکەدا دەخرێتەڕوو.
زانیارییەک گەیشتووەتە کەناڵ8 کە حکومەتی هەرێمی کوردستان بە پاکێجێکی دارایی 29 تریلیۆن دینارییەوە چووەتە نێو پرۆسەی داڕشتنی ڕەشنووسی بودجەی 2027ـی عێراق؛ بەشداریکردنی شاندی باڵای دارایی لەسەر مێزی دانوستانەکانی وەزارەتی دارایی فیدراڵ، بۆ جێگیرکردنی شایستە داراییەکانی مووچە، بەهەمیشەییکردنی دەیان هەزار فەرمانبەری گرێبەست و دابینکردنی پشکی وەبەرهێنانە.
وەزارەتی دارایی هەرێمی کوردستان پێشنیاز و داواکارییە داراییەکانی لەم خاڵانەدا چڕکردووەتەوە:
- دیاریکردنی نزیکەی 29 تریلیۆن دینار وەک کۆی گشتیی پشکی هەرێمی کوردستان لە پڕۆژەیاسای بودجەی 2027.
- تەرخانکردنی زیاتر لە 23 تریلیۆن و 500 ملیار دینار بۆ بودجەی بەکاربردن بە مەبەستی دابینکردنی مووچە، پلەبەرزکردنەوە و مافی خانەنشینان.
- تەرخانکردنی 5 تریلیۆن و 500 ملیار دینار بۆ جێبەجێکردنی پڕۆژەکانی بواری وەبەرهێنان.
- جێگیرکردنی میلاکی بەهەمیشەییکردنی زیاتر لە 60,000 مامۆستا و فەرمانبەری گرێبەست.
- دامەزراندنی 16,000 دەرچووی سێ یەکەمەکانی زانکۆکان و بەشە پزیشکییەکان لەگەڵ قەرەبووی خانەنشینانی ساڵانی 2025 و 2026.
ئەندامانی شاندەکە:
شاندە هونەرییەکە بە سەرۆکایەتیی بەڕێوەبەری گشتیی بودجە و بەڕێوەبەری ژمێرکاری لە وەزارەتی دارایی عێراق بەشدار دەبن لە نووسینەوەی دەقی ماددە یاساییەکان؛ داڕشتنی ئەم بودجەیە بە سیستمی پێشکەوتووی "بەرنامە و دەرئەنجام" دەبێت، هاوکات شاندەکە کار لەسەر دابینکردنی پشکی دارایی هێزەکانی پێشمەرگە و هاوتاکردنی مینحەی کەسوکاری شەهیدان و زیندانیانی سیاسی دەکات لەسەر بنەمای یاسا بەرکارەکانی دەوڵەتی فیدراڵ.
زانیاریی زیاتر بۆ تۆ:
دارایی عێراق: دوو ڕۆژ گفتوگۆ لەبارەى بەشە بودجەى هەرێمى کوردستانەوە دەکرێت
شاندى هەرێمى کوردستان بەشداریی کۆبوونەوەى ئامادەکردنى پڕۆژەیاساى بودجەى کرد
شاندی دارایی هەرێمی کوردستان: داوامانکردووە پشکی 14% لە بودجەی 2027 جێگیر بکرێت
وەزارەتی دارایی عێراق بۆ بودجەی 2027 شاندی هەرێمی کوردستان بانگێشت دەکات
