پووختەی هەواڵەکە:

• شاندێکی باڵای وەزارەتی شەهیدان بۆ دۆسیەی شەهیدان و زیندانیانی سیاسی لە بەغدادە.

• کار بۆ جێگیرکردنی شایستەی دارایی زیندانیانی سیاسی لە پرۆژە بودجەی 2027 دەکرێت.

• شاندەکە لەگەڵ بەرپرسانی پەیوەندیدار و سەرکردە سیاسییەکانی عێراق کۆبوونەوە ئەنجام دەدات.

• هەوڵەکان بۆ یەکلاکردنەوەی دۆسیەی 25 هەزار و 868 زیندانی سیاسی بەردەوامە.

---

شاندێکی باڵای هەرێمی کوردستان بە دۆسیەی زیاتر لە 25 هەزار زیندانی سیاسی و کەسوکاری شەهیدانەوە لە بەغدادن، بە ئامانجی دەستەبەرکردنی تەواوی شایستە داراییەکانیان و هاوتاکردنی مینحەکانیان، هاوکات هەوڵەکان بۆ جێگیرکردنی تەرخانی دارایی لە پرۆژە بودجەی 2027 چڕکراونەتەوە.

---

هەڵوێست و ڕوونکردنەوەی شاندی هەرێمی کوردستان:

• ئەحمەد مام ڕەسوڵ، بەڕێوەبەری کاروباری زیندانییانی سیاسی لە لێدوانێکدا بۆ کەناڵ8 ڕایگەیاند:

• لە بەغدادین بۆ بەدواداچوونی کرداری لەسەر دۆسیەی کەسوکاری شەهیدان و مافەکانی زیندانیانی سیاسیی هەرێمی کوردستان.

• ڕۆژی یەکشەممە 27ـی ئەیلول لەگەڵ دەزگای شەهیدانی عێراق کۆدەبینەوە سەبارەت بە ڕێکارە کارگێڕییەکان و پرسی هێنانەوەی ڕووفاتی ئەنفالکراوان.

• ڕۆژی دووشەممە 28ـی ئەیلول لەگەڵ دەستەی زیندانیانی سیاسیی عێراق تاوتوێی شایستە داراییەکان لە پڕۆژە بودجەی 2027 دەکەین.

• لەگەڵ لایەنە حکومی و سیاسییەکان لە پەیوەندیداین بۆ ئەوەی پشتیوانی تەواو بەدەستبهێنین تا تەرخانی دارایی بۆ ئەم توێژە لە بودجەدا جێگیر بکرێت.

لایەنی عێراقی و سەرکردە سیاسییەکان:

بڕیارە بەرپرسانی دەستەی شەهیدان و دامەزراوەی زیندانیانی سیاسیی عێراق میکانیزمی یاسایی و کارگێڕیی هاوتاکردنەکە تاوتوێ بکەن، هاوکات شاندەکەی هەرێمی کوردستان زنجیرەیەک کۆبوونەوە لەگەڵ عەمار حەکیم سەرۆکی ڕەوتی حیکمە و نوری مالیکی سەرۆکی هاوپەیمانیی دەوڵەتی یاسا ئەنجام دەدەن تا لەڕێگەی ئەم لایەنە کاریگەرانەوە زەمینەی سیاسی بۆ پەسەندکردنی شایستە داراییەکان لە ئەنجومەنی نوێنەران و حکومەت فەراهەم بکرێت.

پێشینەی دۆسیەکە:

ئەم هەوڵانە لە کاتێکدایە، شاندەکەی وەزارەتی کاروباری شەهیدان و ئەنفالکراوان لە کۆتایی مانگی حوزەیرانی ڕابردوو سەردانی بەغدادیان کردبوو، لەو سەردانەدا دۆسیەی 25 هەزار و 868 زیندانی سیاسییان ڕادەستی دەستەی زیندانیانی سیاسیی عێراق کرد، تا هاوشێوەی زیندانیانی سیاسیی عێراق مامەڵەیان لەگەڵدا بکرێت و مینحەکانیان هاوتا بکرێت.

زانیاریی زیاتر بۆ تۆ:

مینحەى زیندانییانى سیاسی لە بەغدادەوە گرفتى بۆ دروست بووە

حکومەت مینحەى رزگاربووانى ئەنفال و زیندانیانى سیاسیى تاوتوێدەکات

شاندی وەزارەتی شەهیدان دۆسیەی زیندانیانی سیاسی دەباتە بەغداد

ئەحمەد مام ڕەسوڵ: سەرۆککۆمار پاڵپشتى گواستنەوەى دۆسییەى زیندانیانى سیاسى هەرێم بۆ بەغداد دەکات