حکومەتی هەرێمی کوردستان رایگەیاند، دوای ڕەزامەندیی بانکی ناوەندیی عێراق (CBI، بانکی بەغداد دەبێتە یەکێک لەو بانکانەی کە بەشداری لە پرۆژەی "هەژماری من" دەکات.
فەرمانگەی میدیا و زانیاری حکومەتی هەرێمی کوردستان دەڵێت: بەشداریکردنی بانکی بەغداد دەبێتە هۆی فراوانکردنی مەودای خزمەتگوزاری و بەرهەمە بانکییەکان کە پێشکەش دەکرێن، ئەمەش ئاسانکاری بۆ خەڵکی کوردستان دەکات بۆ دەستڕاگەیشتن بە قەرز و خەرجیی تایبەت.
ئاماژەی بەوەشکردووە، بانکی بەغداد یەکێکە لەو بانکانەی کە زۆرترین لقی هەیە و لە هەرێمی کوردستان شەش لقی هەیە.
فەرمانگەی میدیای و زانیاری دەشڵێت، "پێشبینی دەکرێت لە کۆتاییی ئەم مانگەدا، بانکی زیاتر بەشداری بکەن، ئەمەش بژاردەی بانکیی زیاتر بۆ هاووڵاتیان دابین دەکات و خزمەتگوزارییە داراییەکان بە شێوەیەکی گشتی فراوانتر دەکات.
وەک ئەوەی فەرمانگەی میدیا و زانیاری باسی کردووە، تاوەکو ئێستا زیاتر لە 200 هەزار هەژماری بانکی بۆ مووچەخۆرانی کەرتی گشتی کراوەتەوە و پرۆژەکە بەردەوامە و تا کۆتاییی ئەمساڵ زیاتر لە یەک ملیۆن مووچەخۆری حکومەتی هەرێم تۆمار دەکرێن.