بەهۆی ژێرئاوکەوتنی بەلەمێکی کۆچبەرانەوە لە دەریای ناوەڕاست، نۆ کۆچبەر خنکاون کە یەکێکیان منداڵ بووە.
فەرماندەی هێزەکانی کەنار دەریا لەئیتاڵیا لە راگەیەندراوێکدا بڵاویکردەوە، کۆمەکی فریاگوزاری و رزگارکردنیان پێشکەش بەو بەلەمە کردووە، کە لە دووریی 30 میل لە باشووری دوورگەی لامبیدوسای دەریای ناوەڕاست ژێرئاو کەوتووە.
لە راگەیەندراوەکەدا ئاماژە بەوەشکراوە، هێزەکانیان توانیویانە 22 کۆچبەر رزگار بکەن و تەرمی 11 کۆچبەری دیکەشیان دەرهێناوەتەوە، کە یەکێکیان منداڵ بووە.
فەرماندەی هێزەکانی کەنار دەڵێت، ئۆپراسیۆنی بە هاناوەچوونی ئەو کۆچبەرانە قورس بووە، چونکە لە کاتێکدا شەپۆلى دەریا بەهێز بووە و لە هەندێک شوێن بەرزیی شەپۆلەکان گەیشتووەتە زیاتر لە دوو مەتر و نیو.
کۆچبەرە ئەفریقییەکان لەڕێگەی بەلەمی پلاستیکییەوە، رێگەی دەریای ناوەڕاست بەکاردەهێنن بۆ گەیشتن بە وڵاتانی ئەوروپا، زۆرجاریش بەهۆی شەپۆلی دەریاوە بەلەمەکانیان تێکدەشکێت و نوقمی دەریا دەبن.
بە گوێرەی سەرژمێری رێکخراوی نەتەوە یەکگرتووەکان، لە ساڵی 2023، زیاتر لە هەشت هەزار و 500 کەس لەڕێگەی کۆچ لە جیهاندا گیانیان لەدەستداوە، بە بەراورد بە ساڵی 2022، لە 20% زیادیکردووە.
