تۆپی سەرمێزی یانەی سلێمانی دووەم سەرکەوتنی لە خولی نایابی عێراق نوسییەوە، بەتەنیا خۆی لەلوتکەی ریزبەندی خولەکەدایە و چاویشی لە 14یەمین نازناوی خولەکەیە.
لە یەکێک لە یارییەکانی قۆناغی یەکەمی خولەکەدا، یانەی سلێمانی میوانداری غازی باشووری کرد، یانەی سلێمانی بە پاڵپشتی سێ یاریزانی عێراقی و پیشەگەرێکی ئێرانی توانی دووەم سەرکەوتنی لەسەریەک بەدەستبێنێت.
یارییەکانی قۆناغی کۆتایی خولی نایابی تۆپی سەرمێزی یانەکانی عێراق، بەبەشداری یانەکانی سلێمانی، جەیش، سەناعە و غازی باشوور بەشێوازی چوون و هاتن ئەنجامدەدرێت، ئەوەش دوای زیاتر لە 40ساڵ خولی عێراق بەمشێوەیە ئەنجامنەدراوە.
دوای تەواو بوونی یارییەکانی قۆناغی یەکەمی خولی نایابی تۆپی سەرمێزی یانەکانی عێراق، یانەی سلێمانی بە دوو سەرکەوتن و شکستێک بەکۆکردنەوەی شەش خاڵ لە پلەی یەکەمی ریزبەندییدایە، یانەی جەیش بەهەمان خاڵی سلێمانی لە پلەی دووەمدایە، هەروەها یانەکانی سەناعە و غازی باشووریش بە سێ خاڵ پلەکانی سێیەم و چوارەمیان گرتووە.
قۆناغی یەکەمی کێبڕکێکانی خولی نایابی تۆپی سەرمێزی یانەکانی عێراق کۆتاییهات، بڕیاریشە هەفتەی داهاتوو کێبڕکێکانی قۆناغی دووەمی خولەکە دەستپێبکاتەوە.
