سەرۆکى ئەنجوومەنى نوێنەرانى عێراق بە وەکالەت دەڵێت، هەوڵەکانى بە ئامانجگرتنى دادگاى باڵاى فیدراڵی مەترسیدارن و ئاسایشى وڵات رووبەرووى هەڕەشە دەکەنەوە.
موحسین مەندەلاوى، سەرۆکى ئەنجوومەنى نوێنەرانى عێراق لە راگەیەندراوێکدا، پشتیوانیى دەسەڵاتى یاسادانانى بۆ دادگاى باڵاى فیدراڵى دەربڕى بە جۆرێک رۆڵى بەهێز بکات لە پاراستنى یەکپارچەیی عێراق و داڕشتنەوەى دەستوور و بەدیهێنانى سەروەرى یاسا.
مەندەلاوى هۆشداریداوە لە هەوڵەکانى بە ئامانجگرتنى دادگاى باڵاى فیدراڵى و داماڵینى لە شەرعییەت، سەربەخۆییەکەى و گومانکردن لە بێگەردیى بڕیارەکانى.
مەندەلاوى ئاماژەى بەوەشکردووە، هەنگاوى لەو جۆرە مەترسیدارە و ئاسایش و سەقامگیریى وڵات رووبەڕووى هەڕەشە دەکاتەوە.
داواشیکرد، پشتیوانیى بڕیارەکانى دادگاى باڵاى فیدراڵى بکرێت لە چارەسەرکردنى دۆسییە نیشتمانییەکان، پاراستنى دەستوور و سامانى گشتى.
