دادگای ئەورووپا: زۆرینەی بڕیاری دادگاکانی تورکیا پێشێلکارییان تێدایە
پووختەی هەواڵەکە
- دادگای مافی مرۆڤی ئەورووپا ڕایدەگەیەنێت کە لە زۆرینەی بڕیاری دادگاکانی تورکیادا پێشێلکاریی یاسایی بەرامبەر تۆمەتباران و مافەکانیان کراوە.
- ئامارەکان دەریدەخەن کە لە کۆی 56 هەزار و 500 دۆسیەی بەردەم دادگای ئەورووپا، زیاتر لە 22 هەزار دۆسیەیان تەنیا پەیوەستن بە تورکیاوە.
- سەرەڕای داواکارییەکانی دادگای ئەورووپا بۆ ئازادکردنی دەستگیرکراوە سیاسییەکان، بەڵام ئەنقەرە تاوەکو ئێستا پابەندی بڕیارەکان نەبووە و ئازادکردنیان ڕەتدەکاتەوە.
بەگوێرەی ڕاپۆرتی دادگای مافی مرۆڤی ئەوروپا و ئەو زانیارییانەی بە کەناڵ8 گەیشتوون، دادگای مافی مرۆڤی ئەورووپا ئاشکرای دەکات کە لە زۆرینەی ڕەهای بڕیاری دادگاکانی تورکیادا پێشێلکاری هەیە و لە ماوەی 6 ساڵی ڕابردوودا ئەو وڵاتە بەردەوام لە پلەی یەکەمی لیستی ئەو وڵاتانەدا بووە کە بڕیارەکانیان پێداچوونەوەی بۆ دەکرێت.
ئامارەکانی دادگای ئەورووپا لەبارەی تورکیا
- ساڵی ڕابردوو لێکۆڵینەوە لەبارەی 6 هەزار و 743 دۆسیە کراوە کە 3 هەزار و 303 دۆسیەیان هی تورکیا بوون.
- لە کۆی 74 دۆسیەی گەورەی دادگاکانی تورکیا دەرکەوتووە لە 66 دۆسیەدا پێشێلکاریی بەرامبەر مافەکان کراوە.
- ئێستا 56 هەزار و 500 دۆسیە لە دادگای ئەورووپان و لەو ژمارەیە 22 هەزار و 600 دۆسیەیان هی تورکیان.
- لە هەر 10 دۆسیەیەک کە لە دادگای ئەورووپا تۆمار دەکرێن 4 دۆسیەیان تایبەتن بە بڕیارەکانی دادگاکانی تورکیا.
دۆسیەی سیاسییە دەستگیرکراوەکانی باکووری کوردستان
دادگای مافەکانی مرۆڤی ئەورووپا چەند جارێک داوای ئازادکردنی سەڵاحەدین دەمیرتاش و فیگەن یوکسەکداغ، هاوسەرۆکانی پێشووتری هەدەپەی کردووە. دادگاکە ڕایگەیاندووە لە دۆسیەکانیاندا پێشێلکاری کراوە و مافەکانیان زەوت کراوە، بەڵام حکومەتی تورکیا تاوەکو ئێستا ئامادە نییە بڕیارەکان جێبەجێ بکات و ئازادکردنی ئەو سەرکردانە وەک مافێکی یاسایی ڕەتدەکاتەوە.
زانیاریی زیاتر لەسەر بابەتەکە
تورکیا بۆ ماوەی 6 ساڵی لەسەریەک لە پلەی یەکەمی ئەو وڵاتانەدایە کە زۆرترین دۆسیەی پێشێلکارییان لە دادگای مافی مرۆڤی ئەورووپا هەیە. بەپێی ئامارەکان نزیکەی نیوەی ئەو دۆسیانەی ساڵانە لێکۆڵینەوەیان تێدا دەکرێت پەیوەندییان بە تورکیاوە هەیە، ئەمەش نیشانەی بوونی کەلێن و پێشێلکاریی گەورەیە لە سیستمی دادوەریی ئەو وڵاتەدا کە وایکردووە زۆرینەی بڕیارەکانی لە ئاستی نێودەوڵەتیدا بە نایاسایی هەژمار بکرێن.
زانیاریی زیاتر بۆ تۆ
دادگای مافی مرۆڤی ئەوروپا: پێشێلکاری بەرامبەر دەمیرتاش کراوە
دادگای تورکیا ئازادکردنی دەمیرتاشی رەتکردەوە
3 کاتژمێر پێش ئێستا