پزیشکیان: ئێران بە چوار مەرج گەرووی هورمز دەکاتەوە
پووختەی هەواڵەکە:
- مەسعود پزیشکیان ڕایگەیاند لەگەڵ عومان گەیشتوونەتە لێکتێگەیشتن بۆ ئیدارەدانی گەرووی هورمز.
- تاران کردنەوەی گەرووەکەی بەستووەتەوە بە هەڵگرتنی سزاکان و ئازادکردنی پارە بلۆککراوەکانی.
- سوپای پاسداران بانگەشەی ئەمریکا بۆ کردنەوەی گەرووەکە ڕەتدەکاتەوە و بە "درۆ" ناوی دەبات.
- سەرۆککۆماری ئێران لە مانگی 9ـدا لەگەڵ ڤلادیمێر پوتن لە قیرغیزستان کۆدەبێتەوە.
مەسعود پزیشکیان گەرووی هورمزی کردووەتە کارتی فشار بەرامبەر ئەمریکا و بۆ یەکەمجار مەرجەکانی کردنەوەی ئاشکرا دەکات. تاران جەخت دەکاتەوە تەنیا لە بەرامبەر ئازادکردنی پارە بلۆککراوەکان و هەڵگرتنی سزای پترۆکیمیاوی ئامادەیە ڕێڕەوێکی کاتی بکاتەوە. ئەم هەڵوێستە هاوکاتە لەگەڵ توندبوونەوەی لێدوانە سەربازییەکانی سوپای پاسداران کە دەڵێن کۆنترۆڵی تەواوی گەرووەکە لە دەستی ئێراندایە.
مەرجەکانی حکومەتی ئێران:
- تاران گەیشتووەتە لێکتێگەیشتن لەگەڵ مەسقەت بۆ ئیدارەدانی گەرووی هورمز بەگوێرەی یاداشتی ئیسلام ئاباد.
- ئێران داوا دەکات سەرجەم سزاکان و ئابڵۆقە ئابوورییەکانی ئەمریکا لەسەر وڵاتەکەی هەڵبگیرێن.
- یەکێکی دیکە لە مەرجەکان هەڵگرتنی ئابڵۆقەیە لەسەر سووتەمەنی و کەرتی پترۆکیمیاوی ئێران.
- واشنتن دەبێت سەرجەم پارە بلۆککراوەکانی ئێران ئازاد بکات بۆ ئەوەی ڕێگە بە تێپەڕینی کەشتییەکان بدرێت.
دیپلۆماسی و جوڵە سەربازییەکان:
مەسعود پزیشکیان بڕیارە لە سەرەتای مانگی 9ـدا لە پەراوێزی لووتکەی ڕێکخراوی شەنگەهای لە بیشکیکی پایتەختی قیرغیزستان، لەگەڵ ڤلادیمێر پوتن، سەرۆکی ڕووسیا کۆببێتەوە بۆ تاوتوێکردنی پەرەسەندنە هەرێمییەکان. هاوکات سوپای پاسدارانی ئێران لە ڕاگەیێنراوێکدا جەختی کردەوە کە دەسەڵاتی تەواوەتییان بەسەر گەرووی هورمزدا هەیە و ڕێگە بە هیچ کەشتییەک نادەن بەبێ هەماهەنگی تێپەڕێت. سوپای پاسداران لێدوانی بەرپرسانی ئەمریکا سەبارەت بە کرانەوەی گەرووەکە بە ناڕاست و "درۆی شاخدار" وەسف دەکات.
زانیاری زیاتر بۆ تۆ
مەسعود پزیشکیان: لە هیچ کام لەو 14 بەندەی لەگەڵ ئەمریکا ڕێککەوتووین پاشەکشەمان نەکردووە
پزیشکیان: یاداشتنامەی لێکتێگەیشتن لەگەڵ ئەمریکا دەرئەنجامی کۆدەنگی بوو
سوپای پاسداران: لەگەڵ عوممان لە بارەی گەرووی هوورمزەوە گەیشتووینەتە ڕێککەوتن
.jpeg)
.jpg)
