گوتەبێژی گەشتوگوزاری سلێمانی رایگەیاند، لە سلێمانی زیاتر لە 1570 ناوچەی گەشتیاری بوونی هەیە، بە سەرجەم قەزاو ناحیەکانییەوە، تا مانگی ئەیلوولی ئەمساڵ زیاتر لە یەك ملیۆن و 500 هەزار گەشتیار سەردانی سلێمانیان کردووە.
ئارام شوانی، گوتەبێژی گەشتوگوزاری سلێمانی بە کەناڵ8ی گوت :" ئەو گەشتیارانەی سەردانی سلێمانی دەکەن، لە 85% گەشتیارانی ناوچەکانی باشوور و ناوەڕاستی عێراقن، بەپلەی دووەمیش گەشتیارانی رۆژهەڵاتی کوردستان و پاشان گەشتیاری بیانین".
گوتیشی :" تا مانگی ئەیلوولی ئەمساڵ زیاتر لە یەك ملیۆن و 500 هەزار گەشتیار سەردانی سلێمانیان کردووە و ساڵی رابردووش رێژەی گەشتیار دوو ملیۆنی تێپەڕاند".
گوتەبێژی گەشتوگوزاری سلێمانی روونیكردەوە، داهاتی گەشتیاران دەچێتە گیرفانی خاوەنکار، پیشەوەران و کاسبکارانی بواری گەشتیاریی پارێزگاکە، هەر لەسنووری پارێزگاکە زیاتر لە 325 هۆتێل، مۆتێل و گوندی گەشتیاری بوونی هەیە.
