بەپێی نوێترین داتاکانی بەڕێوەبەرایەتیی وەبەرهێنانی سلێمانی، لە ماوەی ساڵی 2025دا، فەرمان بۆ دەرکردنی 55 مۆڵەتی نوێ دەرکراوە. هاوکات 11 مۆڵەتی وەبەرهێنان فراوانکردن و هەموارکردنەوەیان بۆ کراوە و 23 مۆڵەتی دیکەش تایبەت بووە بە پەرەپێدان و نوێکردنەوەی پڕۆژە پیشەسازییەکان. بەمەش کۆی گشتی مۆڵەتە نوێیەکان و هەموارکراوەکان لەو ساڵەدا گەیشتووەتە 89 مۆڵەت.

بەگوێرەی لێکۆڵینەوە جیۆلۆجییەکان، عێراق خاوەنی سامانێکی سروشتیی گەورەیە لە لمی سلیکا کە قەبارەکەی بە زیاتر لە 2 ملیار تۆن دەخەمڵێنرێت. ئەم سامانە بەشێوەیەکی سەرەکی لە هەردوو پارێزگای ئەنبار و نەجەف چڕبووەتەوە و وەک کەرەستەی بنەڕەتی بۆ پیشەسازییە جیاوازەکان، پێداویستییە ئەلیکترۆنییەکان و بەرهەمهێنانی شووشە بەکاردەهێنرێت.

حکومەتی هەرێمی کوردستان بۆ جێبەجێکردنی سیستمی ئەلیکترۆنیی "ئەسیکۆدا" مەرجێکی سەرەکی هەیە کە بریتییە لە یەکخستنی پێناسی گومرگی لەگەڵ حکومەتی فیدڕاڵ، ئەمەش لە کاتێکدایە جیاوازییەکی زۆر لە ڕێژەی گومرگی نێوان هەردوولادا هەیە.

یەکێتیی هاوردە و ناردنکارانی هەرێمی کوردستان داتای گشتیی ساڵی 2025ـی بڵاوکردەوە، بەگوێرەی داتاکە،  لە 2025دا 206 کارگەی نوێ مۆڵەتیان وەرگرتووە، زیاتر لە دوو هەزار و 500 هەلیکار ڕەخساوە و زیاتر لە 41 هەزار کۆمپانیای نیشتمانی و بیانیش لە کوردستان کاردەکەن، کە بەگوێرەی ڕێژەیکانیان کۆمپانیا تورکی و ئێرانیەکان پێشەنگن.

محەمەد شوکری، سەرۆکی دەستەی وەبەرهێنان لە کۆنفرانسێکی ڕۆژنامەوانیدا ئامارەکانی وەبەرهێنانی بۆ ساڵی 2025 خستە ڕوو و ئاماژەی بە گەشەکردنی سێکتەری وەبەرهێنان کرد لە سەرجەم شار و ناوچەکانی هەرێمی کوردستان، کە بووەتە هۆی بووژانەوەی زیاتری ژێرخانی ئابووری.