کاوە عەبدولقادر، ئەندامى لیژنەى نەوت و غاز بە کەناڵ8ـی ڕاگەیاند، ئەنجوومەنى نوێنەران دەتوانێت بە دوو شێواز کار لەسەر ڕاسپاردەکان بکات، یەکەمیان ئەوەیە ڕاستەوخۆ سەرۆکایەتیی ئەنجوومەن ڕاسپاردەکان بکاتە بڕیار و ئاڕاستەى حکومەتى بکات بۆ جێبەجێکردن، دووەم هەنگاو ئەوەیە بهێنرێتە ناو هۆڵى ئەنجوومەن و بەدەنگدان بکرێتە بریار و ئاڕاستەى حکومەت بکرێت.

وەزارەتی سامانە سروشتییەکان لە ڕاگەیێنراوێکدا دەڵێت، کەمبوونەوەی غاز 120 ملیۆن پێ سێجایە، بەڵام دڵنیایى دەدات کە کاریگەریی لەسەر کەمبوونەوەی غازی ماڵان نابێت.

محەممەد حەسیب، بەڕێوەبەری نەوت و کانزاکانی سلێمانی بە کەناڵ8ـی ڕاگەیاند، بەهۆی ئەنجامدانی کاری نۆژەنکردنەوە لە کێڵگەی غازى کۆرمۆر، لە سبەی هەینی، 2ـى تشرینى یەکەم، بەرهەمهێنان لە کێڵگەکەیان بۆ 50% کەمدەبێتەوە.

ئاژانسی بلومبێرگ، بڵاویکردەوە، کۆمپانیای بەبازاڕکردنی نەوتی عێراق (سۆمۆ)، نەوتی خاوی مامناوەندی بەسرەی بە داشکاندنی 34 دۆلار و 50 سەنت بۆ هەر بەرمیلێک و نەوتی خاوی قورسی بەسرەی بە داشکاندنی 37 دۆلار بۆ هەر بەرمیلێک لە نرخی پێوەرى نەوتى عوممان و دوبەى دەفرۆشێت بە کڕیارەکانى.

هەناردەی نەوتی عێراق بۆ هیندستان لە مانگی ئەیلولدا بەراورد بە مانگی ئاب 136 هەزار بەرمیلی ڕۆژانە زیادیکردووە ، ئەوەش بەهۆی داشکاندنەکانی سۆمۆوە کە گەیشتووەتە 35 دۆلار بۆ هەر بەرمیلێک لە خوار نرخی بۆرسەی جیهانیەوە.

بەگوێرەی زانیارییەک کە لە کۆمپانیای نەوتی باکوورەوە بە کەناڵ8 گەیشتووە، هەناردەی نەوتی هەرێمی کوردستان و عێراق لەڕێگەی هێڵی نەوتی هەرێمی کوردستانەوە بۆ بەندەری جەیهان زیادیکردووە و ڕۆژی دووشەممە بە گشتی 450 هەزار بەرمیل هەناردە کراوە.